uMthunywa

. . . . . . ntshobe ezindlini iminyango ikhiyiwe

NguMsilisi Dube
SEDLULE umfana! Kulejaha lelokitshini leFusini eTsholotsho eselibhode izindlu zonke zelokitshini leli litshontsha kuzo. Okumangalisayo yikuthi umfana lo ungena indlu ikhiyiwe abuye ayitshiye injalo.Lokhu yikho okubangele ukuthi uzulu abone ngempela ukuthi isela leli litshontsha ngomuthi.

Isela leli elicatshangelwa ukuba lileminyaka yokuzalwa engu-25 kubikwa beselitshontsha lanxa ilanga libalele kungakhathalekile ukuba abantu bakhangele kumbe balele.

Umfakazi oqotho uJephta Ncube uchazele uMthunywa ukuba isela leli labanjwa ngoLwesine kuviki edluleyo ngemva kokuba ligqekeze kwenye indlu.

“Indoda le yangena kweyinye indlu lapho eyatshontsha khona amafoni kunye lama-charger. Ithe isaphakathi abanikazi bendlu baphaphama bayibamba andubana bayibhaxabule.

“Yathi ibuzwa ayizange ithande ukuchaza kabanzi ngokutshontsha kwayo kodwa ngemva kokutshaywa okwesikhathi eside isela leli liveze ukuba kade laqala ukuganga lokhu njalo lisebenzisa imithi ukutshontsha,” kuchaza uMnu Ncube.

UMnu Ncube uqhubekele phambili wathi isela leli laveza ukuba lilekhiye egcotshwe umuthi, elenelisa ukuvula ngayo iminyango yonke.

Kuzwakale ukuba abantu besizwa lokhu baphinda bamhlasela njalo lanxa engazange avule umlomo wakhe azichaze ukuthi yena ngubani.

UMthunywa uchwayisise kabanzi ngodaba lolu kwesinye isisebenzi esisebenza kwenye iwofisi yomthetho eTsholotsho wezwa ukuthi   kuliqiniso ukuba kulendoda eyabanjwa itshontsha ezindlini zabantu.

“Kulendoda eyabanjwa itshontsha ezindlini zabantu yatshaywa kabuhlungu. Indoda le bekumele iye emthethwandaba ngoMvulo kodwa lokhe ingakahanjiswa.

“Sizachwayisisa kabanzi ngesigelekeqe lesi ukuze sazi ukuthi kungani singakangeni  emthethwandaba,” kulandisa umfakazi lo.

Imizamo yokukhuluma lesikhulumi samapholisa esabelweni seMatabeleland North uSiphiwe Makonese yehlule.