uMthunywa
YiNtatheli kaMthunywa
KULENDODA yeFumugwe eMatobo ebhule umakhelwane wayo imsola ngokuthi wekele izifuyo zakhe zadla umbhida esivandeni sayo qede yamfungela ukuthi lowo mbhida uzamila esiswini sayo. UMthunywa ukuzwile lokhu.
Lesi sehlakalo senzakale ngeSonto edluleyo ngemva kokuba umamangala uMnumzana Gift Mpofu okungasatholakalanga iminyaka yakhe yokuzalwa elibale wekela izifuyo zakhe zangena esivandeni sikamsolwa uThomas Jele (40).
UMnumzana Trust Ndlovu ongusobhuku walumango ubikele uMthunywa ukuba ababili laba batshayana kabuhlungu baze bafungelana ngenxa yokuba inkomo zifohlele esivandeni sikamsolwa.
“Umamangala wayeluse inkomo kwelinye iganga elikulesi isigaba njalo lingcelelane lesivande sikamsolwa. Umamangala walibala izifuyo zakhe zangena esivandeni lesi. Kusenzakala lokhu umsolwa wayesesivandeni sakhe ethelela.
“Umamangala wakhipha inkomo zakhe zivele sezidlile njalo sezinyathele umbhida kamsolwa. Umamangala wathi ebona umsolwa emlanda wacela ezinyaweni kodwa umsolwa wamjikijela ngenduku yakhe wamtshaya enyaweni okuyikho okwamenza wawela phansi,” kulandisa uMnu Ndlovu.
UMnu Ndlovu uqhubekele phambili wathi umsolwa watshela umamangala ukuba kumele abhadale umbhida wakhe kodwa umamangala wala ngoba eyisisebenzi komunye umuzi.
“Umamangala wala ukuhlawula umbhida lowo. Ngenxa yaleso sizatho umsolwa wazonda wamfungela ukuba lowo mbhida uzamila esiswini sakhe okuyikho okwabangela ukuba azobika udaba.
“Esintwini kuyazila ukufungela omunye umuntu ngoba engavelelwa yisiga esibi kuthiwa nguye. Endulo kwakuthi nxa ungafungelwa lesosifungo sasigcwaliseka ngakho lakhathesi ngiyakholwa ukuba kuzakwenzakala.
“Udaba lolu sizaluthonisisa ngeSonto kuyonale iviki,” kuphetha uMnu Ndlovu.
