uMthunywa
YiNtatheli kaMthunywa
UDUMO lwabadlali beHighlanders kumdlalo kanobhutshuzwayo selumemetheka laseBotswana nanko kubikwa umgadli waleliqembu uPrince Dube usefunwa ngamaqembu amakhulu kulelozwe.
UDube, osedlala kuhle kuHighlanders uqale ukukhanga amaqembu amanengi kuleli okokuthi lamanye akuzwekazi elisezansi yeAfrica semkhombisa njalo. Abaphathi balumdlali kubikwa bona bafuna ukuba ayedlala eSouth Africa lapho okulemali khona.
Kumbiko ophuma kubafakazi abaqotho abachatheke loludaba kuthiwa uDube ulangazelelwa yiMochudi Centre Chiefs leTafic Sporting. Amaqembu la adlala kuligi ephakemeyo kweleBotswana eye-Be Mobile.
Abafakazi laba babika ukuba abacuphi labomaneja bamathimu la balandele umkhankaso weCosafa Castle Cup eSouth Africa ukuze bayebukela indlela uDube labanye abadlali bamaWarriors ukuthi bazadlala njani. UDube uphakathi kwequla lamaWarriors elincintisa kuCosafa Castle Cup eliqeqetshwa nguSunday Chidzambwa.
“Kulamathimu afuna umfana lo oselodumo kuHighlanders uPrince Dube. Bayamfuna sibili okokuthi engafika ebhadalwa ngemali ezwayo,” kutsho umfakazi lo osemahofisini ezemidlalo kweleBotswana.
Loba kungela maqembu akweleSouth Africa asephumele egcekeni ngokufuna ithalenta likaDube, amaqembu eBotswana asehamba phambili.
Ekuqaleni komnyaka abalandeli beHighlanders bebefisa ukuthi aluba umdlali lo uyahanjiswa kumaqembu aphezulu eAfrica ukuze athole ithuba lokutshengisela kumaligi alemali, endaweni yokuthi aqhubeke edlalela kuleli okungelamali khona.
Ngokudingisisa kwephephandaba likazulu, kubikwa leliqembu selinxuswe ukuthi lidibane lamaqembu amabili ayesatshwayo kulelozwe.
Ebuzwa ngokufunwa komdlali wabo, umaqhuzu weTshilamoya uNhlanhla Dube ubike ukuba akazi lutho kodwa nxa kunjalo, kuyathabisa ukuthi ithalenta leHighlanders liyabonakala.
Abanye abadlali beHighlanders abenze izimanga kumaligi aseAfrica babalisa uBruce Kangwa osedlalela eTanzania.
Kusenjalo, iBosso izethekelela kwele-Botswana ilande ukuyancintisa kumqhudelwano we-Supa Power Cup edolobheni leFrancistown mhlaka 29 kuNtulikazi.
Kulumqhudelwano kulapho okukhangelelwe ukuthi abadlali abanengi bethole ithuba lokubonakala.
Abaqoqi bemidlalo le, inhlanganiso ye-Joy Sports Foundation ithumele umbiko wokuba inhloso yomqhudelwano lo ngeyokudinga imali yokwakha inkundla yezemidlalo yabasakhulayo. Isikhulumi se-Joy Sports Foundation uMurphy Chris Jinde ubikele iphephandaba likazulu ukuba bakhethe ukubiza iHighlanders ngoba besazi ukuthi ilabasekeli njalo abadlali bayo bayalandelwa ngabasekeli bomdlalo eBotswana.
UJinde uthe abadlali abazamela amaqembu wonke bazakhethwa ngabasekeli.
“Abasekeli bazazikhethela abadlali abafuna ukubabona bedlala. Lapha senzela ukuthi abadlali bekholise, bazizwe bekhululekile ukusekela amaqembu abo.”
UJinde uthe umdlali munye ngamunye uzanikezwa i5 000 Pula yokuphatheka kulumdlalo.
