uMthunywa
Thokozile Mbedzi
ZIKHUZA imihlola izakhamizi zesigabeni seDumbura eGokwe ngemva kokuba enye indoda ibulele enye kubangwa isikwelede se$1 sotshwala.
Isiga lesi senzakale kuviki ephelileyo esigabeni esingaphansi kwenduna uChireya.
Umuyi uThembiso Chikhondzi ohlala esiqintini seTaka ufe ngemva kokubhaxabulwa nguBan Mushawezaru.
UMthunywa uzwe ukuthi Chikhondzi wafika wacela ukukweleda obunye utshwala kuMushawezaru elesinye isikwelede se$1 engazi ukuthi wayeseyinyathele emsileni ngoba umetheswacala wahle wavuka ubhova wamhlasela.
Iphephandaba likazulu lixhumane loJethro Mhofu omunye walabo ababekhona kusenzakala lokhu wathi akalankani ngesiga lesi ngoba bonke abantu ababekhona kabazange bakubone njengesenzo esasingaba lesidumbu phansi.
Uthe ababili laba beqala ukuxabana abantu ababelapho baqhubeka bezinathela utshwala.
“Thina besizinathela utshwala singacabangeli ukuthi kungaba lokufa komuntu. Ngesikhathi beqala ukukhulumisana thina kasizange sizihluphe ngabo sasisithi bayazikhulumela nje.
“Sethuka sesibona uMushawezaru setshaya okomuntu osefikelwe lidlozi yikho lapho esethuka khona abantu bonke sagijima sayalamula kodwa sasesiphuzile ngoba uChikhondzi wayesophe kakhulu,” kulandisa uMnu Mhofu.
Induna yakulesi isigaba uChiya Chireya uthe ebuzwa ngalindaba uthe kuliqiniso ukuthi kulomuntu owabulala omunye kubangwa i$1 yotshwala.
“Ngikhuthaza uzulu ukuba axekane lokulwa nxa kulokungezwani baye kubosobhuku abaseduzane labo ukuze bakhumisane umlotha,” kuphetha induna uChireya.
