uMthunywa
Amazambane, indlubu, indumba
IKWINDLA lenza imilomo ihlale imanzi. Kunengi ukudla esikudla ngalesi isikhathi. Okuhle yikuthi konke esikudla kumanzi kungachaywa kome kudliwe sekomile ebusika. Lapha ngikhuluma ngezilimo lezi; amazambane, indlubu, indumba.
Okudingakalayo
* Amazambane amanzi aquntiweyo
* Isawudo
Ukupheka
*Gezisa amazambane kuphele yonke inhlabathi.
* Wapheke avuthwe.
* Thela isawudo ngokuthanda kwakho.
Kungathatha ihola ukuba avuthwe.
Ukudliwa
Amazambane la adliwa ngokucacada akhutshwe abantwana emakhasini andubana adliwe. Abanye bayawachaya adliwe esomile. Adliwa nje abantu bezikwejisele akusikudla kwemini kumbe ntambama.
Indlubu
Okudingakalayo
1. Indlubu
2. Isawudo
3. Imbiza yokupheka
4. Amanzi
Ukupheka
– Gezisa indlubu kuphele yonke inhlabathi.
– Zipheke zivuthwe.
– Thela isawudo.
– Kuthatha ihola ukuba zivuthwe.
– Zizwe ukuba zivuthiwe yini.
Ukudliwa
Cacada indlubu nganye ukhuphe abantwana abadliwayo udle. Zidliwa loba yisiphi isikhathi ikakhulu emini. Ekwindla kuhle ngoba imilomo ihlala imanzi.
Indumba/amahobe
1. Isihlukuluzwana sendumba ezimanzi
2. Isawudo
3. Imbiza yokupheka
Ukupheka amahobe/indumba
NB: Indumba ezimanzi kuthiwa ngamahobe.
* Gezisa indumba anduba uzifake embizeni. Zipheke zivuthwe, kungathatha imizuzu engamatshumi amathathu (30 minutes).
Zithele isawudo
Bona isibisibili ukuthi zivuthiwe ngoba nxa zingavuthisisanga ziyaqumbisa.
Ukudliwa kwamahobe
– Zicacade ukhuphe amakhasi udle abantwana baphakathi
– Zidle nje emini loba ngasiphi isikhathi umlomo uhlale umanzi. Nanzelela izilimo lezi lapho ohlala khona.
Lima lawe ukholise ubumnandi bokuzenzela izinto, imali ayihlali ikhona.