uMthunywa
Thokozile Mbedzi
INHLANGANISO yeAgritex isikhuthaze abalimi ukuthi baqalise ukwakha imithunzi ukwenzela ukuthi bafake izilimo zabo esezivuthiwe ukuze zingacini zibolela emasimini okungehlisa isivuno sabo.
UProvincial Agritex Officer esabelweni seMatabeleland North uMnumzana Dumisani Mbikwa Nyoni uveze ukuthi izilimo ezaqala ukulinywa sezivuthiwe endaweni ezinengi kungakho abalimi kumele bakhe imithunzi yokufaka izilimo lezi ukuze zingaqhubeki zinethwa.
“Abalimi khathesi kumele bakhe imithunzi (ama-shed) ngoba lonyaka izulu linengi kakhulu kungakho izilimo ezifana lamazambane zilakho ukumila njalo nxa zingavuthwa kodwa ziqhubeke ziphansi ziyabola kumbe zimile.
“Njengoba izulu lilinengi lomumbu lawo akwenzeki izitaka phakathi emasimini kungakho imithunzi le ingasetshenziswa ukufaka umumbu osuvuthiwe ozathi nxa ilanga selitshisa ukhitshwe uyechaywa,” kuchasisa uMnu Nyoni.
Kubikwa izilimo lezi eziyabe zifakwe emithunzini nxa kungaba lelanga abalimi bayabe bezikhipha bechaya elangeni babe sebezibisela njalo ngoba izulu alazakali ukuthi lina nini ngoba abalimi bangalahlekelwa yisivuno sabo.
Uthe imithunzi iyaphathisa kakhulu ngoba lonyaka indlela abandise ukuzisebenzisa ukomisa izilimo zabo kazivumelani lomumo womkhathi wezulu okhona.
“Izilimo akumelanga zinethwe ngoba zinganethwa abalimi bacina belahlekelwa yinzuzo yabo ngoba izilimo ziyabola,” kuphetha uMnu Nyoni.
