uMthunywa
Johas Moyo
INHLANGANISO ebona ngempilakahle yezifuyo iLivestock Production Department icebisa abalimi elizweni lonke jikelele ukuthi banakekele izifuyo zabo ikakhulu inkomo ukuthi zingabhaleli emadamu njengoba kungaselamanzi ikanti kwenzinye indawo selike lana okungenzeka ukuthi kubelamadaka.
Ekhuluma loMthunywa uMnumzana Cosmas Muzunde onguLivestock Production Officer esabelweni seMatabaleland North ukhuthaze abalimi ukuthi bananzelele bangalahlekelwa yizifuyo zibhalela ngalesisikhathi ngoba lokhu kwandise ukwenzakala endaweni ezinengi.
“Kuqakathekile ukuthi abalimi baqalise ukulandela inkomo zabo ikakhulu ngezikhathi zemini ukuze babone lapho ezinatha khona ngoba inengi lazo zisengozini yokubhalela emadakeni njengoba amadamu engasela manzi,” kutsho uMnu Muzunde.
Uqhubekele phambili exwayisa abalimi ukuthi babone ukuthi inkomo zabo ziyathola ukudla okwaneleyo njengoba utshani bungasekho kungenzakala ukuthi ziqalise ukucuba, lokho kungenza ukuthi abalimi balahlekelwe yizifuyo ezinengi.
“Sikhuthaza abalimi ukuthi baphe inkomo ukudla ekuseni zingakahambi emadlelweni, lokho kwenza zibe lamandla ngoba kuyingozi ukuthi zinathe amanzi agcwele ezihotsheni zingadlanga ngoba kungazenza zicake njalo ziyaswela amandla okucina kubangela ukuthi zicube kumbe ezinye zibhalele ezihotsheni lapho eziyabe zinatha khona,” kutsho uMnu Muzunde.
Uthe inengi lezifuyo ziyafa ngalesi isikhathi sokuqalisa kokuna kwezulu ngezizatho ezinengi ezehlukeneleyo njalo abalimi kungumlandu wabo ukuthi balwenqabele uhlupho abayabe bebhekane lalo ngazo zonke izikhathi.
“Sinanzelele ukuthi inkomo ngalesi isikhathi ziyafa ngokucuba, ezinye ziyabhalela ikanti ezinye zidla ukudla okuletshefu kumbe izihlahla lotshani okuyitshefu okufana lomkhawuzane. Konke lokhu kungenqatshelwa ngabalimi nxa bethe babambisana banakekela izifuyo zabo njalo kufanele ukuthi bazixotshe zingasondeli endaweni ezilodaka kumbe imikhawuzane,” kutsho uMnu Muzunde.
Uphethe ngokukhuthaza abalimi ukuthi babe lohlelo lokupha inkomo zabo ukudla ekuseni nsuku zonke zingakayi emadlelweni, kungaba butshani, amahlanga kumbe amahohlo ngoba lokho kwenza ukuthi inkomo zibe lamandla.
