uMthunywa
Ilifa nje yinto eyandise ukuthi ikhathaze njalo ilethe ingxabano ezimulini.Abanye phela nxa besizwa ukuthi isihlobo sabo sifile bahle bahlale phansi bacabange ukuthi bona kuyini abangakuthatha okutshiywe ngumufi. Abanye bahlala behlahlele amehlo kunotho yezihlobo zabo belinde ukuthi uzibanibanyana engafa ngizathatha imota kumbe indlu.
Akuzibuze wena othanda ilifa labanye ukuthi wena ungafa bona bazathathani. Ilifa kumele kusale kuzinyembezi zomfelwa kumbe umfelokazi labantwana. Ngoba phela nxa kuyikuthi bekulenkomo lezinye izifuyo, nxa kuyikuthi umfelokazi kasebenzi,usengathengisa eyodwa aqale ibizimusi ezangenisa imali lapha ekhaya. Ibhizimusi isingavimba ukuthi umfelokazi abe elokhu ethengisa izifuyo aze aqede isibaya, ngoba phela nxa abantwana beqhubeka befunda, inhlawulo zesikolo lazo ziyabe zilokhu zikhwela.
Aluba izindlu ezisedolobheni lakoBulawayo ziyakhuluma ukuthi abanikazi bazithola njani, inengi lethu singasala singela mathe. Ngoba phela uthola abafowabo bendonda beyibo asebehlala endlini, umfelokazi lentandane sebehlala ekhaya kumbe behlala ezindlini zabanye, bebhadala i-rent. Abanye ngabathi bazogcina intandane, kanti kuyibo abazogcinwa zintandane, ngoba phela bayabe sebengamadlozi sebehlala la mahala, besidla mahala.
Kuliviki ngithole ithuba lokuxoxisana lentandane zakoSithole uMichael loZinhle.Intandane lezi zabhujelwa ngunina zisezincane uyise nguye owabhubha eminyakeni eyisithupha edluleyo. Nxa uMichael eselandisa indaba uthi ubaba wabo wake wazwana lomunye umama wakoNcube okweminyaka ethile andubana uyise uSithole abhubhe. Uyise wathi esebhubhile indlu yabo eseTshabalala yayisiphelile ukwakhiwa.
Okwabamangalisayo yikuthi njengoba uyise wayesebhubhile abantwana bakaMaNcube yibo abasebehlala endlini sebeyibo abatshaya umthetho. Indlu yayilezikwelede ezimangalisayo baze bathengisa inkomo ukuthi bazovulisa amanzi lamagetsi. Bathe sebezama ukuthi batshintshe indlu bayifake ebizweni labo bathola emthethwandaba umntakaMaNcube esithi nguye owaqedisa indlu njalo nguye owafaka amagetsi.
Lokhu kwabamangalisa kakhulu ngoba phela indlu kayise yayisileminyaka engamatshumi amabili yaphela ukwakhiwa, njalo nxa umntakaMaNcube wayesithi nguye owaqedisisa indlu kwakungasahambelani ngoba ngaleso sikhathi wayeleminyaka elitshumi lantathu.Wayengakasebenzi lokusebenza ukuthi imali yakhona wayeyabe eyithethe ngaphi.
Labomakhelwane babesithi abamazi bona babesithi ngomunye wabantu ababehlala endlini behlawula nyanga zonke. Njengoba umntakaMaNcube wayeselethe inkalakatha zezimali owayesithi wancedisa ukwakha indlu kwasokufana lokuthi athathe indlu. Kodwa okwakumangalisa yikuthi wayesithi kafuni indlu kungangcono bathengise indlu bamuphe imali.
Indaba kamntakaMaNcube yayingelakhanda ingelamsila, yena ayekufuna nje yikuthi abantwana bakaSithole labo bengabilendlu njengaye. UMichael wathi esiza eTrinity Project wayezocela ukuba aphiwe iseluleko sokuba indaba enje ayiphathe njani ngoba bona kabasatholi lutho emandleni kayise. UMichael wacetshiswa ukuba kumele athwale amaphepha endlu wonke ayiwo azafakaza ukuba lindlu yakhiwa nguyise lokuba yaphela nini lokuthi kukhangelwe ukuba ngaleso sikhathi indlu iphela ukwakhiwa lo othi wayakha yena wayesebenza nga njalo eleminyaka emingaki.
Engakunanzelelayo yikuthi nje empilweni abanye abantu bahlala benxwanele ilifa labanye elingelani labo.
Asiyekeleni ukuthanda ilifa. Ubuvila abuphume hatshi ukuthi baqinele izinto ezingaqondananga labo.
Umlobi utholakala kukheli ethi, [email protected], www.trinityproject.biz loba kunombolo zocingo ezithi 0773195 055.
