uMthunywa
Ukungathatheli abantwana incwadi zokuzalwa ngokuphangisa kuyingozi kakhulu esikhathini esinengi ngoba umama womntwana kakwazi okungenzakala ngaphambili. UJulia Mhlanga yintombazana eleminyaka elitshumi lesithupha yokuzalwa.
UJulia wazalelwa eGokwe ekhaya wakhula ehlala loyise logogo ngemva kokuba unina loyise behlukane eleminyaka emithathu ezelwe.
UJulia wazalelwa endlini ekhaya unina ebelethiswa yizalukazi ezihlala khonapho esigabeni.
Ekukhuleni kwakhe uJulia wayesazi uyise logogo wakhe kuphela. Uyise wayengakaze amtshele lutho ngonina, ukuthi ibizo ngubani lokuthi ngowangaphi.
Umnyama kwaba yikuthi ubaba kaJulia logogo babhubha eseleminyaka eyisithupha belandelana. Sebebhubhile uJulia wasala yedwa ngoba kungela esinye isihlobo ayesazi wagcinwa ngomakhelwane.
UJulia wagcinwa ngomakhelwane kodwa babengamphathanga kuhle wathi eseleminyaka eyisikhombisa wabaleka waba ngumuntu ohamba ecela ukudla lendawo yokulala emizini yabantu.
Eseleminyaka elitshumi wazwelwa ngomunye umama afika khona wacela umsebenzi lokudla wahle wamthatha wabuya laye koBulawayo ukuze azohlala laye emsebenzela.
Wabuya lomama lowu koBulawayo uJulia wahlala laye kuhle wamsebenzela waze waba leminyaka elitshumi lanhlanu.
Esebenza njalo uJulia wayengelancwadi yokuzalwa kumbe amaphepha nje atshengisa ukuthi ngowangaphi.
Umama ayemsebenzela wabhubha okwenza wacina sesuka ngoba wayengasafunakali khonapha ekhaya, kwasokumele aqale ukudinga umsebenzi lendawo yokuhlala yena iBulawayo wayevele engayazi.
Wayesehamba elala ezitaladeni zemadolobheni ehamba edinga umsebenzi ecela ukudla ebantwini.
Kwathi kwelinye ilanga wasedojwa ngomunye umama owamzwela usizi ngoba ehlala emdlula ekuseni nxa esiya emsebenzini elele esitaladeni lapho okwasekuyindawo yakhe yokulala.
Wamthatha lumama uJulia wahamba laye endlini yakhe wamupha okokudla lendawo yokuhlala.
Wahlala laye lumama kodwa kwamkhathaza ukuba uJulia kalancwadi yokuzalwa lokuthi wayesithi nxa embuza ngezihlobo athi kakwazi muntu, wayesazi uyise logogo ababhubha emncane.
Umama lo uSihle sezama ukuba uJulia azuze incwadi yokuzalwa lesithupha ngoba kunzima ukuthi ahlale lomuntu ongelamaphepha aneleyo.
Uhlupho yikuthi loba uJulia esazi ukuthi uvela eGokwe yikho azalelwa khona kodwa ukuthi kungaphi kasakwazi ngoba wabaleka esesemncane.
Umuntu nxa ethatha incwadi yokuzalwa uyithathela lapho azalelwa khona, pho nanku uJulia kasakwazi ekhaya, kalasihlobo asaziyo esingamncedisa labangafakaza ukuthi athole incwadi zokuzalwa.
Aluba abazali bakhe bamthathisa esanda ukuzalwa kwakuzazisa ngoba ngabe udubeka ethwele incwadi yokuzalwa.
USihle ufisa ukumhambisa esikolo sokufunda ebusuku kodwa kenelisi ngoba uJulia kalancwadi yokuzalwa.
Lokumgcina uJulia, uSihle usesesaba ngoba kalamaphepha aneleyo atshengisa ukuba ungubani.
USihle wafika kithi eTrinity Project lapho acetshiswa khona ukuba njengoba esazi ukuthi kibo kuseGokwe kadinge esebenzisa isibongo sikayise yikho osokungamsiza ukuba athole ukuthi kibo kungaphi engxenye sengaba lenhlanhla yokuthola izihlobo khonapha esigabeni.
Abazali bayakhuthazwa ukuba bathathele abantwana incwadi zokuzalwa masinya ngoba elakusasa alaziwa, ngoba belakho ukusala sebedubeka bodwa bengela ukuthi baye kubani basizakale.
Akukho owazi ikusasa ngakho kasenzeni izinto ngendlela efaneleyo ukuze abantwana bengakhali ngabazali kusasa.
Kasihlanganeni ngeviki ezayo.
l Umlobi utholakala kukheli ethi, [email protected], www.trinityproject.biz loba kunombolo zocingo ezithi 0773 195 055
