uMthunywa
Buhlebenkosi Gaule
UMPHATHISIKOLO kanye lababalisi besikolo seInyathi High School sebananzelela ukuthi abafundi bangakhuthazwa ukuthi basebenze nzima bejonge ukuphiwa izicoco ekupheleni kwenyanga bacina bephumelela kuzifundo zabo.
Ngalokhu abakulesi sikolo bakhuthaza ezinye izikolo ukuthi zisungule uhlelo lwamaMerit Awards ngoba solwaphathisa abafundi abanengi ukuthi baphumelele kuzifundo zabo.
UMnumzana Nkululeko Zidla ongumphathi walesisikolo ubikele intatheli ukuba uhlelo lolu lwasungulwa ngenjongo yokukhuthaza abafundi ukuthi bajabulele njalo bakhuthale ezifundweni zabo.
“Ngaphansi kwaloluhlelo abafundi abenze kuhle ezifundweni zabo baphiwa isicoco seMerit Award ekupheleni kwenyanga.
“Ngokunanzelela ukuba abanye abafundi badinga ukukhuthazwa ukuthi babone ukuqakatheka kwezifundo zabo sakubona kungcono ukuba kubekhona okungadala ukuncintisana phakathi kwabafundi bonke bekhangelele ukuthola isicoco seMerit Award.
“Esikolo sethu lokhu sesakwenza kwaba lisiko esililandelayo sikhathi sonke okokuthi ekupheleni kwenyanga inye ngayinye kuba lomcimbi lapho abafundi abenze kuhle abaphiwa khona amaMerit Award phambi kwabanye abafundi,” kutsho uMnu Zidla.
Uqhubekele phambili wathi abafundi abanikwa isicoco lesi basiphiwa phambi kwabanye abafundi ngoba lokhu kukhuthaza abanye babo ukuthi bafise labo ukuma phambi kwabanye bephiwa lesosicoco.
Uthe loluhlelo solwaphathisa isikolo ukuthi sithuthukise inani labafundi abenza umsebenzi omuhle njalo oncomekayo eSabelweni seMatabeleland North kuminyaka emithathu edluleyo.
ULovemore Sibeko owayefunda eInyathi uMnumzana Lovemore Sibeko osefunda eNational University of Science and Technology (Nust) uchaze ukuba lowo mncintiswano wama-merits wabanceda kakhulu ngesikhathi esafunda eInyathi ngoba wawusenza abafundi abanengi bafise labo ukuthola ama-merits ekupheleni kwenyanga.
“Uhlelo olwaqaliswa eInyathi High School sifunda khona lwaphathisa abafundi abanengi ngoba inengi labafundi lalisebenza nzima wonke umuntu efisa ukuthola isicoco leso okuyikho okwasenza saphumelela kuzifundo zethu.
Ngabe ezinye izikolo ziyaluqalisa loluhlelo ngabe abafundi abanengi bakhatshana kuzifundo zabo ngoba lukhuthaza abafundi ukuthi bazimisele kuzifundo zabo,” kuphetha uMnu Sibeko.
