uMthunywa
Johas Moyo
IZAKHAMIZI zeThombankala eZhombe zilokhu zisathithibele kulandela isihluku sokubulawa komunye ujaha equnywa umphimbo ngeviki ephelileyo ngezinye izelamani ezingomakorokoza kulindawo.
Kuvele ukuthi uRecent Nyandeni ugwazwe wasequnywa umphimbo yizelamani uDorai Thandazani Dlamulo loJoseph Dlamulo efela isikhwili lamacala kamnewabo okutholakale ukuthi nguMbasela Nyandeni. Kubikwa uMbasela Nyandeni oziphilisa ngokwemba igolide walwa lalaba ababili asebengabasolwa ngemva kokungaboni ngaso linye ekutsheketsheni igolide okungekho emthethweni eVenice, indawo eseKadoma.
Iphephandaba likazulu lizwe ukuthi umuyi ‘usepoka’ kungelansuku ngaki ebulewe. Isakhamuzi esikhulume loMthunywa siveze ukuthi umuyi kubikwa ubetshibilika emotsha awele phansi njalo kubikwa ubenyikinyeka lebhokisini.
UMthunywa uphuthume wayafika kuleyondawo wafica kungathi kuleyezi eligubuzele umphakathi ngoba abantu belokhu besatshaqekile ngesehlakalo lesi esilusizi.
Ekhuluma ngalindaba uMnumzana Sipho Siwela ubike ukuthi yena wazibonela ngawakhe amehlo umuyi egwazwa ngabasolwa.
“Kangilamathe ungibona nginje, ngilokhu ngisatshaqekile, akuyona into elula ukukhohlwa lokhu esakubona mhlalokhuya. Ngaqala ngisithi kumbe liphupho elibi nje kodwa akwaze kwaba njalo. Kwenzakala sibili sikhangele njalo lalamuhla asikwazi ukuthi sizakufa sayikhohlwa lindaba.
“Kambe abantu bangaquma umuntu okwembuzi phambi komphakathi, lokhu ngathwetshulwa yingwe angikaze ngikubone okunje,” kutsho uMnu Siwela.
UMthunywa uphinde njalo waxoxa lomunye umfowabo kamuyi uPraymore Sikhosana owehluleke ukukhuluma ngolaka langokudabuka kwenhliziyo wenelisa nje ukukhombela lapho okwafela umfowabo.
Umzukulu kamuyi uThembani Ndlovu obedanile kakhulu njalo elokhu edidekile ngendlela abhubhe ngayo uthe ulokhu engakukholwa ukuthi uRecent kasekho.
“Lokhu ngingakukholwa ukuthi umalume usehambile njalo ngeke ngiphinde ngimbone futhi. Wahlaselwa ngimkhangele waze wafa ngehluleka khona ukumnceda efela ize, indaba ezingelani laye.
“Baqala bamgwaza basebemquma umphimbo, igazi lavuza sangathi liphuma empompini wahle wawela phansi,” kutsho uMnu Ndlovu.
Umfowabo kamuyi uMbasela ubikele lintatheli ukuthi kakwazi ayekubangiswa ngabasolwa baze bamtshaya ngoba wayecabanga ukuthi babedakiwe kuzaphela kodwa bamlandela lekhaya sebezokulwa ngamandla yikho nje bacina sebebulala umnawakhe emavinkilini.
“Eqinisweni angazi ukuthi abasolwa bebengibangisani sibisibili ngoba kangizange ngixabane labo.
Engikukhumbulayo yikuxabana kwethu kwanyakenye njalo mina bengizitshela ukuthi yinto eyaphelayo kanti kangibuzanga elangeni.
“Ngibuhlungu ngokufa komfowethu efela indaba angayaziyo, ngilapha angazi lokuthi ngithini ngoba inhliziyo yami idabukile. Okwenza lokhu kube lukhuni ukwamukela yikuthi ufele mina, kangazi ukuthi kusuke kwathini kodwa ngikhathazekile emoyeni,” nguMbasela lo.
Umalume kamuyi uNkulumo Nyandeni ubikele iphephandaba likazulu ukuthi inhliziyo yakhe kayisoze ihlaliseke engakachasiselwa ukuthi umzukulu wakhe ufeleni sibili ngoba ubengumuntu ozithuleleyo.
“Umzukulu wami ubengasimuntu othanda umsindo, ubelijaha elizithobileyo. Ilukhuni lindaba ngoba lalamuhla kangizwisisi ukuthi bambulaleleni,” nguMnu Nyandeni ngelodabukileyo. Ebuzwa ukuthi kuliqiniso ukuba umuyi usevuka uthe kazilutho ngalokhu.
UMthunywa uzwe ukuthi imuli yabasolwa ihlawuliswe inkomo ezingu-15 kodwa okwakhathesi sikhiphe eziyisithupha ukuze abekwe.
Omele isikhulumi samapholisa esabelo seMidlands uInspector Joel Goko uthe indaba le isifikile endlebeni zabo.
“Indaba yendoda efe ngemva kokuqunywa umphimbo sesiyizwile. Abasolwa babotshiwe njalo silokhu sisalucubungula loludaba,” nguInsp Goko lo.
