uMthunywa
Mthokozisi Dube
IQEMBU leTshilamoya, iHighlanders selihlezi esihlothini sengalane yePremier Soccer League ngemiklomelo engu-23 kulandela ukunqoba kwalo iBorder Strikers nge 2-0 emdlalweni odlalelwe eMagumeni izolo.
IBosso ingene kulo umdlalo ikhangelele ukungcwaba iBorder Strikers ngemiklomelo eminengi kodwa amaqembu aqede ihlandla lakuqala kuyi 0-0.
Ekuphendukeni kwamaqembu kuhlandla lesibili kulapho-ke umdlali weBorder Strikers uFrank Mukarati abambe khona ibhola ezama ukuvimba unompembe uAllan Bhasvi wahle wakhombela umbekwa.
Umdlali weBosso otshisayo kulezinsuku uBruce Kangwa nguye othethe lumbekwa yezwakala isukuma inethi kwagidwa kwakholiswa eSoweto. UKangwa uhle wathuma unozinti weBorder Strikers uTalent Sunday emavinkilini okwenze iBosso yavuka khwatshu yavungama lenkundla.
UKnox Mutizwa yena okukhangelelwe ukuthi aligiqe okokucina egqoke ezimnyama ngeSonto ubekhalela ukuba ngabe nguye othatha lumbekwa kodwa ibhentshi leBosso lakubona kufanele ukuba linike uKangwa ithuba ngoba uMutizwa esevalelisa.
Kulo umdlalo uKnox wenze amaphutha amanengi wasehlawula abalandeli bakaMantengwane ngokunika uKangwa ikhekhe sokusele imizuzu elitshumi ukuthi umdlalo uphele. UKangwa utshaye ithulisa mntwana eyenze lomqeqetshi weBorder Strikers wamncoma ngebhola lakhe.
Umqeqetshi weBorder Strikers uSaul Chaminuka uthe ukuphiwa kweBosso umbekwa yikho okwenze abafana bakhe bahle balahla ithemba.
“Ngilokudana okukhulu kulandela ukuthi abadlali bami bebenze kuhle kodwa unompembe wabaphambanisa ngombekwa njalo yiwo owenze salahlekelwa yindlela ebesidlala ngayo,” kuveza uChaminuka.
UChaminuka ubike ukuba izenzo zabonompembe yizo njalo ezenza iqembu leChicken Inn labizwa njengegqungquthela zomnyaka odluleyo kodwa aliyanga ndawo emidlalweni yeAfrican Safari.
“Intshantshu kumele zivele ngokudlala kwabadlali langemisebenzi yabaqeqetshi hatshi ukuthi onompembe babe lesandla kumpumela yemidlalo,” kuchaza uChaminuka.
UChaminuka ubike ukuba iBosso ingakaphiwa umbekwa yehlulekile ukuthola izihluthunelo zokuyahlohla okutsho ukuthi kungabanga lombekwa impumela ibingama ngenye indlela.
Umqeqetshi weBosso uElroy Akbay akafihlanga injabulo yakhe noma nje evumile ukuthi kuhlandla lakuqala iqembu lakhe alidlalanga kuhle.
“Obekuqakathekile singena kulo umdlalo yimiklomelo emithathu eyiyo esiyitholileyo yasiphanyeka esihlothini selogu kungakho sekumele sikhangele umdlalo olandelayo,” kubika uAkbay.
Kumdlalo wangeSonto iBosso idlala leqembu leZPC Kariba eMagumeni okuliqembu abangakaze badlale lalo lokhe langena kuligi ephezulu.
Lokhu kufakazwe languMaqhuzu weqembu leTshilamoya uNdumiso Gumede oveze ukuthi umdlalo lo umlalisa ngaphandle kwengubo.
“IZPC liqembu elisihlupha kakhulu kungakho ukubakhona njalo kukaChidzambwa (uSunday) ngibona kuzenza lumthwalo ubenzima,” kuveza uGumede ngesikhathi somdlalo eBarbourfields.
