uMthunywa
Gerald Sibanda
IMIDLALO yenguqu engaphansi kweZifa kulumhlubulo welizwe izaphela kuyonale impelaviki njalo intshantshu zeligi le i-Arenel Movers izafuna ukuqeda ngokunqoba kumdlalo wokucina.
I-Arenel Movers ayikanqotshwa lonyaka.
Bazangena umango belande ukuyadlala leqembu leBinga United lona eliqede isizini lidonsa nzima. I-Arenel, edume ngelithi “Abafana beziwiji” iqeqetshwa nguKudzai Mhandire.
Umqeqetshi lo uzafuna ukuthi agcine isithunzi lodumo lwakhe lokuba ngumqeqetshi ongazange ayizwe eyokudliwa.
Bambalwa abaqeqetshi abakwenelisa lokhu.
Kusenjalo, iqembu leZPC Hwange lizaqeda isizini likunombolo yesibili. Bekumele lidlale leZimbabwe Saints eseyaxotshwa kuligi, ngakho umdlalo kawusoke ubekhona.
Kunombolo yesithathu kuleTalen Vision yona ezanxusa iqembu leRatanang. ITalen Vision ngelinye lamaqembu akade ekhangelelwe ukuthi ancintisele ukuya kuPremier League kodwa kwehlule.
Abafana be-Adachi FC bazadlala le-Ajax Hotspurs enkundleni yeWhite City. Iqembu leli eliqeqetshwa nguPhilani “Beefy” Ncube likunombolo yesine.
Kweminye imidlalo, iCIWU idlala lezimbamgodi zeCasmyn. Lo ngomunye umdlalo ozahlabusa ngoba lapho ezibana khona kwandise ukuba lokuthokoza kubabukeli.
IBosso90 izangena indlela ibhekise amabombo edolobheni leHwange lapho ezadlala khona leDRC United.
Iqembu lamasotsha eleNdlovu Iyanyathela idlala leJordan Sinnott enkundleni yeFilabusi.
Imidlalo:
Talen Vision vs Ratanang, Jordan Sinnott vs Indlovu Iyanyathela, DRC United vs Bosso90, Casmyn vs CIWU, Binga Pirates vs Arenel Movers, Adachi vs Ajax Hotspurs
