uMthunywa
Buhlebenkosi Gaule
UGATSHA lwezemfundo yaphansi laphezulu kuviki ephelileyo luchome impumelo yezikolo ezinhlanu koBulawayo ngokuzipha imivuzo ye-Bells Award.
Izikolo ezinhlanu lezi iSt Patrick’s Primary, Khumalo Primary, Founders High School, Pumula High kanye leHigher Learning Centre ziphiwe umvuzo lo nguPermanent Secretary wogatsha lolu, uDokotela Sylvia Utete.
UMqondisi wezemfundo koBulawayo uMnumzana Dan Moyo uchaze ukuba umvuzo lo owaziwa ngokuthi yi-Bells Award, ngumvuzo owawukhona kudala lapho unobhala wezemfundo ayehamba enika imivuzo kuzikolo ezazigcina kuhle insimbi yesikolo kodwa khathesi usunikwa izikolo ezenze kuhle kumihloliso.
“Umvuzo weBells Award kudala wawunikwa izikolo ezazigcina kuhle insimbi yesikolo nguNobhala.
“Kodwa-ke khathesi izinto sezaguquka unobhala usesipha imivuzo izikolo eziyabe zenze kuhle ezifundweni,” kutsho uMnu Moyo.
Uqhubekele phambili esithi imivuzo le iyisibongo kulezizikolo esivela kunobhala wezemfundo njalo uhlose ukukhuthaza ezinye izikolo ukuba zenze kuhle kuzifundo lazo.
“Isikolo sinye ngasinye kulezizikolo ezithole lumvuzo besithola umvuzo ongange $5 000 obuyisibongo sokwenza kuhle kuzifundo zabo,” kutsho uMnu Moyo.
UMnu Moyo uveze ukuba kulungiselelwa ukuba ngomnyaka ozayo kuphiwe umvuzo ophezulu kuleminye kusikolo esiyabe senze kuhle kuZimbabwe yonke.
“Ngomnyaka ozayo sifuna ukuhlola izikolo zonke eziyabe zenze kuhle zathola imivuzo eziqintini zazo ukuze sithole isikolo esizabe senze kuhle kulazo zonke esizaphiwa umvuzo ophezulu kulezinye,” kuphetha uMnu Moyo.
