uMthunywa
Cornelius Luphahla
ZIKHATHAZEKILE izakhamizi zaku wadi 5 eNtabazinduna ngezifuyo eseziphelile zitshaywa zimota emgwaqweni.
Kubikwa sokuyingoma yansukuzonke ukutshaywa zimota kwezifuyo ngesizatho sokuthi akulacingo lokuvikela izifuyo ukuthi zingafiki emgwaqweni omkhulu osuka koBulawayo usiya eHarare.
UMthunywa ukhulumisane loMnumzana Patrick Ntini oyisakhamuzi sakule indawo wachaza ukuthi inkomo seziphelile.
“Inkomo zethu seziphelile ngokutshaywa zimota, ngikhuluma nje kuyonale iviki ephelileyo kutshaywe eziyisithupha. Kuwonalo umnyaka kuphela zingaba yi-500 esezifile.
“Ucingo olwalulapha emgwaqweni weHarare lwafakwa ngabo 1950 ngakho kudala lwabola olunye lwaluqanyulwa zimota ezibhewukayo. Kwathi kusiyafika ama 1980 lwasoluqamuke lwaphela kodwa sokuze kulamuhla lokhe lungakabiselwa,” kulandisa uMnu Ntini.
Esinye njalo isakhamuzi sakule indawo uMnumzana Daliwe Nyoni ugcizelele wathi ubuhlungu ngoba inkomo ingatshaywa yimota umnikazi kavunyelwa ukuyithatha uqala ubhadale.
“Okubuhlungu kakhulu yikuthi uthi ukhalela inkomo yakho etshaywe yimota uphinde ubhadaliswe imali yokulungisisa leyomota etshaye inkomo. Ngikhuluma nje esinye isakhamuzi sakule indawo sibhadaliswe $1,500 khonapho sitshayelwe inkomo ezintathu.
“Ngokubona kwami abatshayeli bezimota kabaselananzelelo emgwaqweni. Isimanga yikuthi labemigwaqo singaze sibabikele uhlupho lolu abenzi lutho ngakho,” kutsho uMnu Nyoni.
Izakhamizi lezi zibikele njalo uMthunywa ukuthi ngabe kuyatholakala izihlahla endaweni le bezizagebhela izigodo kulo umgwaqo ukuze zivikele inkomo zazo ekutshayweni zimota.
UMthunywa wenelise njalo ukukhulumisana lokhansila kawadi 5 uMnumzana Bekithemba Qongo wachaza ukuthi ngabe abemigwaqo bayangenela ngoba inkomo zabo seziphelile.
“Isicelo sethu yikuthi abogatsha olubona ngemigwaqo bangenele basisize ngokusifakela ucingo,” kuphetha ukhansila Qongo.
