uMthunywa
Msilisi Dube
IZAKHAMIZI zelokitshini elitsha lePelandaba West koBulawayo sekuzwakale ukuba ezinye zazo zigebha inhlabathi yemangcwabeni eNumber 6 ukuze zakhe izindlu zazo, uMthunywa ukuzwile lokhu.
Izakhamizi lezi kubikwa zigebha inhlabathi le ebusuku osekubangele ukuba amabhokisi ezidumbu avuke esegcekeni.
Kuzwakale ukuba abanye abagebha inhlabathi le bayithengisa nge$15 ibhara.
Izakhamizi ezihlala elokitshini le Number 6 duze lamangcwaba la ziveze ukuba abantu laba kabahloniphi abafileyo yikho nje besenza lokhu abakwenzayo.
Elinye inina eliziveze ngokuthi nguNkosazana Nkomo uthe isenzo sokugebha inhlabathi emangcwabeni sitshengisa ukuthi abafileyo kabasahlonitshwa njengendulo.
“Nsukuzonke ungedlula duzane lamangcwaba la uzwa ngamapiki lamafotsholo abantu begebha inhlabathi beyithwala ngamabhara.
“Kuyisimanga lokhu okwenziwa ngabantu ngoba nxa umuntu ethatha inhlabathi yemangcwabeni kufana nje xathu lokuthi umuntu uthatha ingcwaba alifake endlini,” kutsho uNkszn Nkomo.
“Abantu abatshontsha inhlabathi le kabaziwa njalo akulamuntu osewake wabaqonda wababuza ukuthi bakwenzelani lokhu ngoba wonke umuntu uyesaba ukuthi bengabe beyizigelekeqe,” kutsho uNkszn Moyo.
Wengezelele wathi abantu laba kabakwazi ukuthi ukugebha amangcwaba abantu abangabaziyo kungababizeka amashwa.
“Kudala amangcwaba abehlonitshwa njalo esesabeka kodwa kulezinsuku abantu kabaselandaba yikho nje becina besiyatshontsha emangcwabeni.
Esinye njalo isakhamuzi esikhulume loMthunywa uMnumzana Philip Mpofu, uthe kwezinye insuku amakhofini avuka esegcekeni inhlabathi isithethwe.
“Ngeviki edluleyo kulelinye ingcwaba eliphandiweyo ibhokisi lasala likhanya egcekeni. Abanikazi bomufi bathi bezokhangela ekuseni bafica kwelinye icele ibhokisi selisegcekeni bahle balakhela ukuze lingaphindi liphandwe,” kulandisa uMnu Mpofu.
UMnumzana Decent Ndlovu osebenza kunhlanganiso ekhangele ngezemvelo eyeEnvironmental Management Agency (EMA) uthe kuliqiniso ukuba kulezigelekeqe ezigebha inhlabathi yamangcwaba zibe sezithengisela abakhayo.
“Sengithole imibiko eminengi yokuthi kulabantu abatshontsha inhlabathi emangcwabeni eNumber 6. Kunyanga edluleyo ngike ngahamba ngayahlola umumo khonale ngathola ukuba abantu abatshontsha inhlabathi le sebegebha eduze lamangcwaba.
“Lokhu kuyingozi ngoba amangcwaba la alakho ukucina esewela,” kutsho uMnu Ndlovu.
Wengezelele wathi laba abazatholakala betshontsha inhlabathi le bazajeziswa.
“Kulicala ukutshontsha inhlabathi, nxa umuntu eyifuna kaqonde kwabekhansili kumbe kithi ukuze sibatshengise indawo ezisemthethweni lapho okungagejwa khona inhlabathi yokwakha.
“Sicela ukuba uzulu asisize angabona lowo ogebha inhlabathi le asibikele kumbe atshele amapholisa aseduzane laye. Njengabantu kumele sihloniphe amangcwaba njalo akumelanga ibhokisi lomuntu ofileyo libonakale egcekeni ngoba lokhu kuyazila,” kuphetha uMnu Ndlovu.
Ikhansili yakoBulawayo seyafaka ibhakane elilomlayezo wokuthi izakhamizi lezi zingagebhi inhlabathi emangcwabeni.
