uMthunywa
Cornelius Luphahla
ILOKITSHI leMganwini liveza ukuthuthuka okukhulu koBulawayo nanko phela esinye sezakhamizi zakule indawo sesisungule indawo yokuphumulela lokuzithokozisa ebizwa ngokuthi kukoS’nqo Ngekhaya Community Tourism.
Indawo le yasungulwa nguNkosazana Philela Sibanda ku2433 eMganwini ngenhloso yokwamukela izethekeli ezivela endaweni ezehlukeneyo kanye lokubukisa ikakhulu ezamasiko atshiyeneyo. Okunye njalo indawo le ngeyokuthi abantu bazithokozise ngendlela ezehlukeneyo.
UMthunywa uvakatshele kule indawo wakhulumisana loMqondisi wale indawo uNkosazana Philela Sibanda ochaze ukuthi indawo le wayisungula eminyakeni emibili edluleyo ngenhloso yokuthuthukisa ezamasiko.
“Indawo le yaqala ukusebenza ngenyanga kaMfumfu ngomnyaka ka2014 ngemva kokuvulwa ngokusemthethweni nguMnumzana Cont Mhlanga. Inhloso yethu yikuzithuthukisa, ukuthuthukisa ezamasiko, uBulawayo kanye leZimbabwe jikelele. Noma nje yasungulwa yimi kodwa wonke umuntu ohlala lapha ukhululekile ukuthi azozithokozisa kumbe ancedise lapha,” kutsho uNkszn Sibanda.
Uqhubekele phambili njalo wachaza ukuthi iCommunity Tourism le ngeyokuqala ukubakhona kuleli njalo abantu bayayijabulela kakhulu.
“ICommunity Tourism le ngeyokuqala ukusungulwa lapha eZimbabwe njalo kukhanya iyathuthuka kakhulu. Noma nje ngayisungula ngingedwa kodwa khathesi ilamalunga ekhomithi alitshumi ahlala khonapha eMganwini.
Ngenza lokhu ngemva kokunanzelela ukuthi abantu baphumelela nxa bencedisana.
“Ngikhuluma nje khathesi sikhangelele ukuthi abantu abafuna ukuzobukisa impahla zamasiko kanye lemigido lengoma babuye bezobukisa. Okunye njalo abahlabeleli ikakhulu abakulelilokitshi ngiyababiza nxa kulezethekeli ezidinga ukuthokoziswa bezohlabela bathole imali yokuzithuthukisa.
“Laboc abafuna ukuzothatha imifanekiso yemitshado kanye lokunye nje bakhululekile ukuthi bezokwenzela lapha.
Lokhu akudingi ukuthi umuntu abelemali enengi kumbe encane kodwa sivuma khonokho akwenelisayo ngalesosikhathi.
“Ngakho ngesifiso sami ngabe uHulumende kumbe ikhansili yakoBulawayo iyangenela isincedise ukuze sithuthukise iBulawayo,” kutsho uNkszn Sibanda.
Kubikwa indawo le isivakatshelwe ngabantu abatshiyeneyo abagoqela izikolo ezifana leKyle College yeMasvingo, kanye labantu abavela kwamanye amazwe agoqela iItaly leJapan.
UMthunywa ukhulumisane lesinye isakhamuzi sakulelilokitshi uNkosazana Sichelesile Ncube waveza ukuthi ulokujabula okukhulu ngoba indawo le iyabathuthukisa labo.
“Mina ngizwa ngithokoza kakhulu ngoba indawo le iyasiphakamisa kakhulu. Ngikhuluma nje wonke umuntu ohlala kule indawo nxa kuthe kwafika ama-tourists uyamenywa abuye aphiwe umsebenzi wokwenza ukuze athole imali. Lokhu kudala ukuthi sithole okungasinceda lapho esiswela khona njalo sibambane,” kutsho uNkszn Ncube.
UMthunywa wenelise njalo ukukhulumisa loNkosazana Nomvuyo Mathonsi onguRegional Tourism Manager weZimbabwe Tourism wachaza ukuthi indawo le uyayazi njalo kufanele ithuthukiswe.
“Indaba yako S’nqo Ngekhaya Community Tourism siyayazi njalo kufanele ithuthukiswe ngoba ithuthukisa ezamasiko kuleli. Ngokufisa kwethu ngabe abantu abanengi bayangena ukuze bancedise ekuthuthukiseni ezamasiko,” kutsho uNkszn Mathonsi.
UActing Deputy Director weDomestic Tourism uNkosikazi Chipo Chitanga uchaze njalo ukuthi indawo le itshengisa ukuthuthuka kwabesifazana kanye lelizwe.
“Indawo yakoS’nqo Ngekhaya itshengisa ukuthuthuka kwabomama ngakho kuqakathekile ukuthi baphatheke kule indawo ukuze bathuthuke. Ngalokhu-ke sikhangelele ukubafundisa ikakhulu uMqondisi wayo ukuze enelise ukukhokhela kanye lokufundisa abanye ngokuzithuthukisa,” kuphetha uNkkz Chitanga.
