uMthunywa
YiNtatheli kaMthunywa
KULENDODA yesigabeni sakoSeke bucwadlana leHarare ezivumela ingelanhloni ukuthi ngeSonto ephelileyo idle ingcekeza yomkayo ukuze umkayo engenzi ubufebe.
Esidla ingcekeza le ubesenza isifungo sokuthi umkakhe engafebi, abonwe nguye kuphela.
Isifungo lesi usitshelwe ngenye inyanga ngakho kwasokuhambelana lalokho ayekutshelwe ngomunye umphurofethi.
UMnumzana Gibbon Muzemba (47) ohlala esiqintini sikaSobhuku uTapera, ngaphansi kukamlisa uMazhindu — yena othe ngeqiniso ingqondo zakhe ziphelele njalo udle ingcekeza ebisanda kwenziwa ngunkosikazi wakhe, uElizabeth Mubvindi (37) ngoLwesihlanu kuviki ephelileyo.
Ukuze athole ingcekeza le, undoda lo uthi walisa unkosikazi wakhe ukuya esambuzi wathi enzele ingcekeza enkonxeni leyo acine seyidla.
“Udaba lolu elilulandileyo liqiniso, ngadla ingcekeza yomkami ekhangele. Ngiyidle yaphela yonke du. Ngiyidlile sibili asikuthi ngiyahlanya, kodwa yisifungo engisiphiwe ngumphurofethi lenyanga ngenxa yobufebe bakhe, ngiyakwazi akwenzayo. Ngikwenze ngoba ngiyamthanda njalo ngifuna athande mina kuphela, luthando lolu.
“Isifungo lesi kuthiwe angaze akhombe uzahlanya adle ingcekeza njengalokhu engikwenzileyo.
“Unkosikazi wami nxa esiyathengisa imibhida koMakoni, eSt Mary’s ufika akhombe, ngiyakwazi lokho. Yikho ngimhambele enyangeni lakumphurofethi,” kutsho uMuzemba.
Udaba lokudla ingcekeza lwenzakale ngenxa yokuthi umkakhe wathi evela thengisa wabuya lomakhalekhukhwini omutsha wamfihla. Wacina sembona okuyikho okubangele ukuthi acabangele ukuba uthengwe lidlalicatsha.
“Ngizwa kuthiwa unkosikazi wami nxa esekuthengiseni endaweni ezibalisela iChikwanha, Makoni, St Mary’s leMbare uyabe esenza okobufebe. Kulabanye abake bambona esemkotweni eSt Mary’s kodwa mina ngazithulela. Ngabona ukuthi ngingamtshaya ngizambulala yikho ngenze isifungo sokudla ingcekeza yakhe.
“Ngisalelwe yisifungo sesibili lesesithathu engifuna ukuzenza kuye engingasoze ngizichaze.
UMuzemba uthi kazange enyanye ukudla ingcekeza yomkakhe ngoba ubefuna ukugcwalisa isifungo sakhe asitshelwe ngumphurofethi lenyanga.
“Ngaqala ukuthandana lomfazi lo ngomnyaka ka2008 lapho ebengilonkosikazi wami omdala uAlice Gurure owabhubhayo. Wayengumngane wakhe singomakhelwane eSt Mary’s. Ngahamba ngayamngcwabela koGurure, eMutoko ngaphiwa unkosikazi wokuzovusa amaseko ngala ngoba besengithandana loElizabeth,” kutsho uMnu Muzemba.
Uthe ubufebe bukaMubvindi wabubona ngesikhathi esathandana laye unkosikazi wakhe omdala engakabhubhi wacabanga ukuthi uzatshintsha angamthatha.
“Sihlezi sonke kodwa lokhu ngamthatha asilamntwana sonke, ulomntanakhe,” kugcizelela uMnu Muzembi.
UMnu Muzemba uqhubekele phambili wathi “angikaze ngidle ingcekeza yomuntu noma eyami, ngiqala ngekankosikazi wami ngoba ngiyamthanda. Inyanga engihambe kuyo isebenzisa ubunyanga obuhlangahlangeneyo.
‘‘Ingcekeza yomkami ngiyikapule ngezandla zami mathupha ngayiqeda du. Ngithe sengiqedile nganatha lamanzi ngendlela ebengilayelwe ngayo. Ngingakenzi lokhu ngacela umkami ukuthi abhale amabizo abomakhwapheni bakhe bonke yena wathi kalabo,” kutsho uMuzemba.
Ebuzwa ngempilakahle yakhe ngemva kokudla ingcekeza uthe kazange agule kodwa wezwa umzimba usuqine saka.
UNkszn Mubvindi uthe umkakhe wambamba ngamandla ukuthi enzele ingcekeza enkonxeni athi eqeda kuyenza wayidla wayiqeda du.
“Waqala ukuthetha ngoba ngithenge umakhalekhukhwini weSamsung. Ifoni le ngangiyifihlile ngoba ngisazi ukuthi uzangitshaya esithi ngiyithethe ngaphi. Ngaqala ngimqambela amanga ngisithi ngiyigcinisiwe kodwa ngenxa yokwesaba ngacina ngiphathwa yisisu ngathi ngifuna ukuyazikhulula kodwa wala wathi ngenzele enkonxeni eyayisendlini.
Uqhubekele phambili wathi wakwenza lokhu kodwa wamangala esebona umkakhe esethatha lelobhakede esesidla ingcekeza yami ngimkhangele.
“Ngesikhathi eyidla iphunga laselibambe nki endlini kungasahlaleki. Wathi eqeda ukudla wanatha amanzi. Lokhu kwangethusa ngoba kangikaze ngikubone,” nguMubvindi lowo.
Uqhubekele phambili wathi walala ubusuku bonke ebhodla njengomuntu ofikelwe ngamadlozi njalo eginqa umzimba wonke kodwa esithi uyagodola.
“Ekuseni ngabaleka ngaya komlisa ngisesaba ukuthi angangibulala ngoba ukudla ingcekeza kayisiyonto encinyane.
Lalamuhla lokhu ngihlala komlisa.
UMubvindi uthe wabikela abakibo ngesenzo somkakhe.
Uthe kungenzakala ukuthi umkakhe wenze lokhu ngenxa ye-satanism.
“Ukuthi ngithengisa umzimba ngamanga, asazi mhlawumbe yi-satanism, ngizezwa sengidliwa esiswini. Ubaba lo kazange alobole ngitsho sihlezi nje.
“Umkami wake wathatha impahla yami yangaphakathi ngisesikhathini wahamba layo enyangeni ngoba ecabangela ukuthi ngithengisa umzimba. Kuze kube lamhlanje impahla yami le kangikaze ngiyibone,” nguMubvindi lowo.
Kubikwa umkakhe engakadli ingcekeza yakhe wamnika iphepha lokuthi abhale phansi amabizo amadlecatsha akhe onke. Umlisa uKenneth Mazhindu uthe indaba le yamangalisa kakhulu njalo ufuna idluliselwe enduneni uSeke.
“Kangikaze ngizwe kuthiwa umuntu udle ingcekeza yakhe loba eyomunye umuntu. Lobu yibuthakathi obusegcekeni, ukuthi umuntu adle ingcekeza yomunye umuntu ngoba efuna ukumkhiya,” kutsho usobhuku uMazhindu.
Umlisa uMazhindu uthe wafika emzini kaMuzemba esiyazwisisa ngendaba le wathi ufuna unkosikazi wakhe aphenduke.
“UMuzemba wathi ngiqale ngiphendukise umkakhe ngoba sewadla kanye ingcekeza yakhe kukanti inyanga yakhe yathi ayidle kathathu okutsho ukuthi sokusele kabili,” kutsho uMazhindu.
Omkhulu kunhlanganiso yabosiyazi kanye labaphurofethi yeZimbabwe National Practitioners Association (ZINPA) uKhulu uFriday Chisanyu uthe uMuzemba wasebenzisa imithi emibi njalo unkosikazi wakhe kumele athole usizo masinyane.
