uMthunywa
Brandon Moyo
I-West Indies iqale izolo ukuzilungiselela ukudlala leqembu lesizwe amaChevrons emidlalweni emibili yohlobo lwe-Test Cricket ezaqala mhlaka 4 Nhlolanja eQueens Sports Club koBulawayo.
Iqembu leWindies elifike koBulawayo ngoMvulo lizabe liqala ukudlala leZimbabwe kumdlalo we- test ngemva kokucina ngomnyaka ka2017 lapho okwadlalwa khona imidlalo emibili njalo.
Ingqungquthela uBlessing Muzarabani utshayelwa ihlombe ngabanye abadlali kumdlalo weODI odlalelwe eRawalpindi ePakistan
Ekucineni kwabo banqoba iZimbabwe ngo 1-0.
Ama-Windies akhokhelwa ngu Kraigg Braithwaite, abuye eZimbabwe loBrian Lara ongomunye wengcitshi ezilenhlonipho kumdlalo wekhilikithi.
Imidlalo yomibili le ihlelelwe kumalanga ka4-8 kunye lo12-16 Nhlolanja. Ngaphambili kokuthi umdlalo uqale, iWest Indies izadlala umdlalo wobungane leZimbabwe A enkundleni yeBulawayo Athletic Club (BAC) ngoMgqibelo mhlaka 28.
IZimbabwe izabe idlala umdlalo we Test wokuqala kusukela ngo 2021 lapho abadlala khona leqembu le Bangladesh eHarare.
Imidlalo yonke yomibili izadlalelwa enkundleni yeQueens Sports Club koBulawayo. Abadlali ababili be West Indies uJason Holder lo Alzarri Joseph bazahlangana lequmbu labo lamuhla ngemva kokudlala eSouth Africa.
