uMthunywa
Arnold Ndlovu loNomthandazo Ndlovu
ZIKHALA ezimathonsi izakhamizi zelokitshini lePumula South, leMthunzini edolobheni lakoBulawayo ngemva kokuba izulu elilesiphepho lidilize izindlu izakhamizi zasala egcekeni.
Izulu elilesiphepho leli eline kuviki ephelileyo ngoLwesithathu litshiye izindlu ezinengi eMthunzini ezakhiwa yinkampani yeHawkflight zizonde zigane unwabu ukuthi kanti yizindlu bani ezakhiwa yinkampani le.
Ekhuluma loMthunywa uNkosazana Princess Dube uthe uzwa ubuhlungu ngezimali zabo ezihambe zikhala nanko phela sebelala phandle njengembuzi.
“Thina lokhu sisabhadala izimali inengi lethu kalikaqedi ukubhadala kodwa izindlu sezidilikile, abanye bethu balimele balalisiwe esibhedlela, kumele inkampani le izame icebo ngeke sekele imali zethu zihamba njalo,” kutsho uNkszn Dube.
“Ezinye zezindlu lezi bezingela brickforce njalo lesamende sakhona asiqinanga ngitsho, kambe sokungadilika izindlu zelokitshi elilodwa ezakhiwe yinkampani yinye? Kubikwa izulu leli elidale umonakalo omnengi endaweni ezinengi ezigoqela leMahatshula lidilize izindlu ezinengi ezakhiwa yinkampani le osekusolisa abantu ukuthi bayakwazi nje ukwakha lababantu.
UMnumzana Cyril Tshuma oyisakhamuzi elokitshini leli uthe baphelelwe abazi lokuthi benzeni ngoba ukwakha ezinye izindlu kuthatha isikhathi eside.
“Abantwabethu bafunda lapha, abanye bethu asila zihlobo eziseduze esingacatshisa khona amakhanda, sizakwenza njani? Khathesi sokuyisikhathi sezulu sizalala ngaphi kodwa? Inkampani le kumele isibonele icebo bona bakwenzelani ukuqumela kulokuthi bayakhe kuhle izindlu eziqinileyo,” kutsho uMnu Tshuma.
“Yebo siyavuma umoya wawumnengi sibili kodwa sokungadilika izindlu ezisanda kwakhiwa, kulezindlu zakwamanye amalokitshi amadala ezakhiwa kudala sisanda ukuthola uzibuse zisamile lalamuhla,” kucghaza uMnu Tshuma.
Kubikwa inkampani le yake yamangalelwa enkantolo ngomnyaka ka2011 ukuthi yakha izindlu ezingaqinanga njalo eziyingozi esezingadilika noma nini. Lokhu kugcwaliseke ngeviki ephelileyo lapho izakhamizi ezidlula amatshumi amahlanu ezisele egcekeni sezingasela zindlu. Ebuzwa ngodaba lolu umqondisi weHawkflight Enterprises uMnumzana Mngane Ncube uthe bayaxolisa kakhulu ngesehlakalo lesi esehlele abantu belokitshini lePumula.
“Siyaxolisa kakhulu kuzakhamizi, sizama konke okusemandleni ethu ukuthi sibone ukuthi izindlu zabo ziyalungiswa,” kuphetha uMnu Ncube.