uMthunywa
Thokozile Mbedzi
KULAMASELA enkomo amabili abanjwe xhaka esiqintini seDelfontin eGwanda yizakhamizi eqhuba inkomo eziyisificamunzwe munye ngoLwesibili ngeviki ephelileyo.
Amasela la, uSibangilizwe Ncube oleminyaka engu-42 loNdumiso Nyathi babanjwa betshontsha inkomo ezingu-9 zikaMnumzana Francis ngesikhathi sixotshelwe emadlelweni. Ekhuluma lentatheli kaMthunywa uMnumzana Ndumiso Nyoni uthe njengezakhamizi sebezimisele ukuba babambane ukuze baphathisane nxa behlangana lenhlupho ezitshiyeneyo ngezifuyo zabo.
“Sikubone kufanele ukuba munye ngamunye wethu abe lilihlo elibona konke okwenzakalayo ezifuyweni zethu. Abanye bethu bathe besemadlelweni babona amadoda amabili ethinta inkomo ezingu-9 basebebiza abanye bathe belokhu bekhangele bananzelela ukuba inkomo lezo zazixotshelwe egangeni bona basebekhatha ezingu-9.
“Sithwele nzima ngamasela abantu kabasahambi hambi ngenxa yomkhuhlane weCovid-19 njengoba abantu kuthiwa bahlale emakhaya kungakho amasela lawo asesebenzisa ithuba leli ukuba antshontshe inkomo zabantu besiyathengisa,” kuchaza uMnu Nyoni.
Uqhubekele phambili esithi bathe sebewabambile amadoda la bawahambisa emapholiseni.
Imizamo yokukhulumisana lesikhulumi samapholisa esabelweni seMatabeleland South ulnspector Philisani Ndebele yehlule.