uMthunywa
Gladmore Ncube
KULENDODA yakoBulawayo elokitshini leNkulumane 5 elila ezimathonsi ngomfowabo ithi wenza imali ngaye njalo ithi ayisoze yakwekela kwadlula lokhu.
UMnumzana Zwelibanzi Moyo ukhala ngomfowabo uMnumzana Sibusiso Moyo ukuthi wamenza wagula umkhuhlane wengqondo ukuze aphumelele empilweni njalo abelenotho emangalisayo.
Intatheli ikhulumisane lomakhelwane walezi zelamani (ibizo siligodlile) obikele iphephandaba ukuthi udaba lolu luvele lukhona ngoba imuli yonke ingahlangana udaba lolu luhlezi luvuka kuxatshwane kube nzima.
“Imuli le ingahlangana ikakhulu izelamani lezi zombili zingaba zonke udaba lolu luyavuka kube lomsindo kakhulu uMnu Zwelibanzi exabana lomfowabo esithi wamloya wamenza wabalomkhuhlane wenqondo.
“Udaba lolu labanye omakhelwane bayalwazi, bakhuluma ngalo bathi labo bayasola ukuthi kungani uSibusiso kwathi umfowabo eqala ukugula laye waqala ukuvula izitolo ekhaya ethenga lezimota.
“Udaba lolu ngiyalusola ngoba khathesi kuthiwa umfowabo omunye oseNamibia laye khonale sehlutshwa ngumkhuhlane ofana lokamfowabo owenqondo,” kuchaza umakhelwane oqotho.
Intatheli ikhulumisane loMnu Zwelibanzi Moyo othe yena watshelwa ngabantu ukuthi okwenza angani ingqondo zakhe ziyabaleka yikuthi wagangelwa ngumfowabo efuna inotho.
“Mina ngangizisebenzela kuhle eSouth Africa ngingakaguli. Umfowethu wayehlala esithi ufuna ngiyemgcinela inkomo zakhe ekhaya, lokhu kwakungimangalisa ukuthi kungani esitsho njalo ngoba lami ngangizisebenzela kuhle.
“Isikhathi sahamba ngaqala ukugula, umfowethu wangidingela imota wangisa ekhaya. Ngifika lapha koBulawayo ngadingelwa osiyazi ngomalume bangitshela ukuthi ngagangelwa ngumfowethu ukuze enze imali ngami.
“Lokhu kwakuliqiniso ngoba akuhlalanga inyanga ezintathu ngiqale ukugula umfowethu weyesesenza izimanga ekhaya esakha izitolo ethenga lezimota ezehlukeneyo.
“Lokhu kwangenza ngananzelela ukuthi wayesithi ufuna ngiyemgcinela inkomo zakhe ekhaya ngoba wayesekuhlelile ukuthi ngizagula ingqondo, okutsho ukuthi nguye owangigulisayo,” kuchaza uMnu Moyo.
Intatheli ikhulumisane loMnu Sibusiso Moyo othe vele abantu abasweli okokutsho nxa bebona umuntu ephumelela.
“Abantu abasweli okokutsho nxa bengabona umuntu ephumelela. Umnawami angimzondelanga ngoba uyagula ngilethemba lokuthi uzasila njalo ngiyaqhubeka ngimsekela,” kutsho uMnu Moyo.
Intatheli ikhulumisane loNkosikazi Moyo unina walezi zelamani othe kakwazi ukuthi kuyini okungene ebantwaneni bakhe ngoba ulababili abahlaselwa ngumkhuhlane munye qede lapho basole umfowabo.
“Abafana bami ababili bahlaselwe ngumkhuhlane wengqondo, angazi ukuthi kuyini abakwenzayo okwenza bethole isijeziso esibuhlungu kangaka.
“Ukusolana kwabo lokhu begconana ngokuthi bayaloyana angikukholwa mina ngoba lasekukhuleni bakhula bethanda ukuxabana begconana ngezinto ezingekhoyo,” kutsho uNkszn Moyo.
