uMthunywa
Edson Khumalo
IZISEBENZI kanye lezihambi enzikini yedolobho lakoBulawayo sezihlala zisevalweni ngezenzo zabafana ababamba abantu “inkunzi” ilanga ligwaze umhlaba edolobheni.
Ekhuluma lentatheli kaMthunywa, uMnumzana Allen Nyoni othengisela eduzane leCity Hall ongomunye wababona kubanjwa amantombazana amabili inkunzi uchazele iphephandaba ngesehlakalo asibona sisenzakala phambi kwamehlo akhe.
“Abafana laba sebesenza khona kanye esikubona kubhayisikopo kamabonakude u-Uzalo eyokubamba umuntu inkunzi bembhuza njengenyosi.
“Wababona ngaphi abantu abagcwala umuntu bamhluthunele izikhwama bamkhwathaze lomakhalekhukhwini bemncedisana bebanengi, angithi nje nguZalo wonke lo,” kuchaza uMnu Nyoni.
UMnu Nyoni uphinde waxwayisa abantu ukuthi baqaphele izigebengu lezi ezithathela abantu imali zithenge izidakamizwa.
Intatheli kaMthunywa iphinde yaxhumana loNkosazana Nkosilomusa Ndiweni ochasise ngesehlakalo asibona sisenzakala komunye owasila kumaPhara la.
“Abafana laba babebanengi, bengaba yisitshiyagalo lunye nxa ngingaphambanisi bezama ukubamba unkazana owayegqoke ibhulugwe efake umakhalekhukhwini esikhwameni.
“Oyedwa wabafana laba wafika wamthuza uthe ekhilikithela bazama ukumgcwala abanye bedonsa isikhwama ayesigaxe emahlombe omunye ezama ukukhipha umakhalekhukhwini esikhwameni sebhulugwe wasizwa ngomunye ujaha okwakusobala ukuthi isitsotsi sabo uyasazi,” kuchaza uNkszn Ndiweni.
UNkszn Ndiweni uphinde wabikela intatheli ngodlame lwabafana laba ababefuna ukutshaya ujaha lo owasiza untombazane lowu owayesebanjwa inkunzi ngama-phara lawa.
Amaphara yizigebengu ezibamba abantu inkunzi zisenzela ukuthola imali yokuthenga izidakamizwa.
Okhulumela amapholisa uChief Inspector Precious Simango uchaze ukuthi amapholisa awakabi lolwazi mayelana lezigebengu lezi ezizenza amaphara kaZalo.
