uMthunywa
Buhlebenkosi Gaule
ZIMADOLONZIMA njalo zithithibele izakhamizi zesigabeni seTobotobo, eNsuza ngemva kokuba esinye isakhamuzi sakule indawo kuvele ukuthi besigcine umgobho ozithweleyo emgodini waso wamanzi okubikwa sawutshiyelwa nguyise njengelifa.
Insindabaphenduli le yenzakale kuviki ephelileyo lapho esinye isakhamuzi sakule indawo (igama siligodlile) esibanjwe khona xhaka ngumphurofethi uMoreblessing Gumede odume ngokuthi nguMaravaza, sigcine inyoka le emgodini waso wamanzi sisithi lilifa esalitshiyelwa nguyise, uMthunywa uyakuveza lokhu lamhlanje.
Kuzwakale ukuthi umgobho lo ubusuhluphile kule indawo ngokuhlukuluza abesifazana emacansini ebusuku, ukubulala izifuyo zabomakhelwane kanye lezemuli yaso.
Izigigaba lezi kubikwa yizo ezenze izakhamizi zakule indawo zibize umphurofethi lo ukuze azohlahlula isigaba.
UMnumzana Stephen Khabo oyisakhamuzi sakule indawo ubikele intatheli ecingweni ukuba wayekhona mhla kukhitshwa inyoka le njalo besebekhathele ngayo.
“Mina ngangikhona mhla umphurofethi uMaravaza ekhipha inyoka le njalo kangilankani ngengakubonayo, abantu bagangile sibili phandle lapha.
“Kambe kulomuntu olesibindi sokugcina inkalakatha yenyoka engakaya ethi wayitshiyelwa nguyise.
Okungimangalisayo yikuthi umgodi lo eyayihlala kuwo yikho lapho esikha khona amanzi okunatha.
“Umphurofethi lo wasuka waqonda emgodini wesakhamuzi lesi wafika wafafaza ngamanzi akhe sabona sekuphuma inyoka yangena esakeni elalibanjwe yilesosakhamuzi.
“Ngemva kwalokho walivala balibambisana bahamba lalo umphurofethi wafika walitshisa sikhangele,” kulandisa uMnu Khabo.
UMthunywa uzwe ukuthi isakhamuzi leso sathi sibuzwa ngenyoka le savuma phambili kwabantu ukuthi wayitshiyelwa nguyise ethi wayeswele ukuthi uzayilahla njani noma nje yayisimthwalise nzima kanye lomdeni wakwabo ngokubulala izifuyo.
“Inyoka le kubikwa yayithi ingabulala isifuyo komakhelwane isuke lapho iqonde emzini lo okwadala ukuthi izakhamizi zingasazwani lemuli.
UMthunywa uxhumane lomphurofethi lo uMaravaza waveza ukuthi isakhamuzi lesi besesilesikhathi eside satshiyelwa ilifa lomgobho lo nguyise.
“Ngokukhokhelwa ngumoya ngiboniswe ukuba isakhamuzi lesi sigcine umgobho obusukhathaza lapha esigabeni ngakho ngimsizile sawukhupha sawutshisa,” kuphetha umphurofethi uMaravaza.
Imizamo yokukhulumisana lalo ocatshangelwa ukuba nguye owatshiyelwa ilifa lomgobho yehlule ngoba ucingo lwakhe belungangeni.
