uMthunywa
Zintatheli zikaMthunywa
KULEMULI yeNketa ehlelwe liyezi elimnyama ngoLwesibili kuyonale iviki ngemva kokuba elinye ilunga layo elileminyaka engu-15 lizibophele ngoba libizelwe abazali esikolo ngenxa yokulova.
Umuyi okutholakale ukuthi nguNqobile Lusinga obekubanga likaFomu 2 ubefunda esikolo seMaranatha High School.
Ngaphandle kokulova kubikwa umfundi lo uphinde watholakala elamadola eMelika kanye lama randi esikhwameni sakhe sesikolo.
UMthunywa uvakatshele elokitshini leNketa lapho umuyi azibophele khona wezwa ukuba isililo siseCowdray Park ngakibo kwalumfundi nanko phela ubehlala loninomncane eNketa.
Ekhuluma loMthunywa omunye umfakazi oqotho ongathandanga ukuqanjwa ngebizo uveze ukuba umfundi lo utholakale elemali okucatshangelwa ukuthi ubeyitshotshele uninomncane.
“Umfundi lo kukhanya ubeselova esikolo nsuku zonke nxa kunguMvulo. Ngenxa yalokhu ababalisi babiza abazali bakhe ukuze kuxazululwe ngokulova kwakhe esikolo.
“Abazali bafike esikolo babikelwa ukuba umntwana uyalova esikolo nxa kunguMvulo. Kubikwa ngesikhathi kukhulunyiswana ngalindaba uninomncane womntwana lapho abehlala khona eNketa wasechaza ukuba uke wabona umntwana elomakhalekhukhwini angamaziyo kodwa wamfihla.
“Umakhalekhukhwini lo wadingwa esikhwameni sakhe samabhuku kwacina sokubonakala imali yeMelika lamarandi athi ebuzwa ngayo wathi kulenye esendlini.
“Ngokuzwa lokhu abazali kanye lababalisi bathi kayethatha leyomali engekhaya bengazi ukuba sebezithezele olulenkume nanko phela wahamba waloba okwacina kubangela ukuthi bacine belandela ngekhaya lapho abamfica vele esezibophele lanxa wayengakafi,” kutsho umfakazi lo ongathandanga ukuqanjwa ngegama.
Kubikwa lanxa abazali bazama ukuquma intambo lokhu kwehlula ngoba wedlula.
Intatheli ixhumane lodadewabo kamuyi okutholakale ukuthi nguMandy nje kuphela othe akukho abangakutsho kuntatheli njengemuli.
Uninomncane kamuyi okunguye obehlala lomuyi laye uthe kasoze akhulume lentatheli ngomntanakhe.
