uMthunywa
Yintatheli kaMthunywa
LOKHU bebona angathi bazavuka ebuthongweni abafundi besikolo seRegina Mundi Secondary duze lakoSipepa kulandela ukuzwa ngomunye wabo ozihilele ezindlini zabo zokulala esikolo.
Isehlakalo lesi senzakale kuyonale iviki lapho omunye umfundi ongumfana okungasatholakalanga ukuthi ukusiphi isibanda, atholakale efile ngemva kwezindlu zokulala ama-dormitories.
UMthunywa uzwe ukuba umfundi lo ubekwe izolo.
Intatheli ixhumane lomunye umfakazi oveze ukuba indaba yomntwana ozibopheleyo iliqiniso.
“Umfundi lo uzibophele esikolo ngemva kwezindlu zabo zokulala ngempelaviki.
“Isizatho sokwenza lokhu asikaveli kodwa amapholisa alokhu esakuchwayisisa,” kuchaza umfakazi lo.
Ekhuluma loMthunywa uProvincial Education Director wesabelweni seMatebeleland North, uMnumzana Jabulani Mpofu uvumile ukuthi kulomfundi ozibulele esikolo.
“Samukele umbiko wokuthi kulomfundi ongumfana obefunda ehlala esikolo seRegina Mundi Secondary ozibophele ngemva kwezindlu zabo zokulala esikolo ngempelaviki. Isizatho esibangele ukuthi enze lokhu asikaziwa kodwa sisadingisisa,” ludaba,” kuphetha uMnu Mpofu