uMthunywa
Langelihle Moyo
KUNSUMANSUMANE yendaba eyenzakale eGambiza Secondary School mhlaka 25 kuyonale inyanga, ngaphansi kwenduna uChiundura, kulendoda ezibopheleyo ngemva kokuxabana lowesifazane owayengumkayo.
Kubikwa mhlaka 24 kuyonale inyanga ngehola lesitshiyagalolunye ebusuku uAnderson Mureverwi wafika esikolo seGambiza Secondary School, lapho okuhlala khona owayengunkosikazi wakhe uFaith Solomon ohlala lomntanabo oyinkazana oleminyaka yokuzalwa emibili. UMureverwi wayebuye ukuzokhangela umntwana okwakuthiwe kezwa kuhle uphathekile emzimbeni ngakho ke wacina eqede ubusuku bonke ekhona. Kuthe ekuseni ngosuku olulandelayo mhlaka 25 ngehola lesikhombisa uFaith wabuza uMureverwi ukuthi uhamba sikhathi bani kodwa umbuzo lowu awuzange umphathe kuhle. Umbuzo wacina sudala ingxabano phakathi kwalaba ababili.
Kuvezwe ukuthi uMureverwi wathatha ingqamu emkulwini wagwaza uFaith kane emhlane waphinda wamgwaza kanye engalweni yesandleni senxele, ngemva kwalokho wadliwa ngumswenya.
UBernard Chitando owesilisa oleminyaka yokuzalwa engu-53 olipholisa lesigaba wezwa ngodaba lolu wagijima wayafika lapho okwakwenzakale khona isiga lesi wathola uMureverwi esezibophele elenga ephahleni.
Isikhulumi samapholisa enkabazwe uInspector Emmanuel Mahoko uthe udaba lolu lusezandleni zamapholisa asachayisisa ngokugcweleyo.
“Udaba lolu lusezandleni zamapholisa, njalo asachwayisisa ngokugcweleyo ngodaba lolu. Ngakho ke ngithanda ukuxwayisa uzulu nxa kulengxabano asidingeni omunye umuntu ozasincedisa ukuxazulula udaba ngokuthula kungela dlame,” kuphetha uMahoko
