uMthunywa
Ethel Ncube
KULAHLEKE umphefumulo eMatshiloni eBeitbridge ngemva kokuba enye indoda izibophele ngentambo yafa ngemva kokungezwani lomkayo obevakatshe lapho ayeke wendela khona.
Indaba le yenzakale ngeviki ephelileyo lapho umuyi uCollen Sibanda oleminyaka engu-36 yokuzalwa ezibophele ngentambo wafa ngemva kokubona umkakhe uLorraine Ndou.
Kuvele ukuba uLorraine wathola umbiko wokuba umntanakhe amzala emendweni wakuqala uyagula. Wavuka ekuseni wabikela umkakhe ukuba ufuna ukuyabona umntanakhe ongezwa kuhle ngakibo walubhekisa lapho ayeke wendela khona esiyabona umkhuhlane.
Ngemva kwamalanga amabili uSibanda walandela esiyakhangela umkakhe lomntanakhe wathi efika lapho kwaba lokungezwani phakathi kwakhe lomkakhe okwenza wasuka esethukuthele.
USibanda kubikwa wabuyela emzini wakhe wafika wathatha intambo wazibophela.
UMthunywa uxhumane lesikhulumi samapholisa eMatebeleland South uInspector Loveness Mangena obike ukuba udaba olunjalo balwemukele.
“Sithole udaba lwendoda ezibopheleyo. Sithanda ukukhuthaza uzulu ukuba angaba lohlupho abize omunye umuntu wesithathu ongasiza ngokucebisa okungaba yinkokheli zomdabu, inkokheli zesonto kumbe umngane nje ukuze bancedise ukuxazulula udaba kulokuthatha umphefumulo wakho,” kuphetha uInsp Mahoko.
