uMthunywa
Musa Janga
KULOMFANA oleminyaka yokuzalwa engu-14 ohlala elokitshini leCowdray Park koBulawayo ophose wabulala uyise ngokumfakela umuthi wamagundwane etiyeni ngoba emalise ukuya eGoli.
Umsolwa esingeke samqamba ngoba emncinyane umiswe phambi komthethwandaba weTredgold ngeviki edluleyo esetheswa icala lokuzama ukubulala uyise ngemva kokuxabana loyise bebanga ukumalisa ukuyavakatshela unina kweleSouth Africa.
Umtshutshisi uMnumzana Nkathazo Dlodlo ubikele inkundla ukuthi mhlaka 20 Mpalakazi ngomnyaka odluleyo umetheswacala wafaka umuthi wokubulala amagundwane embizeni kayise yokuphekela itiye kanye lemputshini ehlose ukumbulala.
“Umsolwa wazama ukubulala uyise mhlaka 20 Mpalakazi ngokumfakela umuthi wamagundwane embizeni yokuphekela itiye kanye lasemputshini okuyikho ayezakusebenzisa ukupheka,” kuchaza uMnu Dlodlo.
Ubuye wathi ngenhlanhla umamangala wezwa umnuko womuthi wokubulala amagundwane ekudleni lokhu wasebuza indodana yakhe ukuthi kufakweni njalo kayizange iphike ngitsho, yahle yavuma ukuthi ibifuna ukubulala uyise ukuze iyebona unina kweleSouth Africa njengoba uyise emalisa.
Umamangala wahle wayabikela amapholisa ngalindaba.
Ngemva kokulalelisisa icala leli umantshi uTinashe Tashaya udlulisele phambili lelicala ukuthi liqhutshwe kunyanga ezayo.
