uMthunywa
Ethel Ncube
UMHLABELELI wakoSipepa ohlabela eseTsholotsho usethembise abalandeli bakhe ukuba uzahwatsha idlalade lakhe lesibili umnyaka ungakapheli.
UThabani Khumalo ohlabela imaskandi yena esazakala ngokuthi ngu Menz Omuhle ibizo lakhe lokuhlabela seveze ukuba uzakhupha idlalade lakhe lesibili.
Ekhuluma loMthunywa uveze ukuba kunzima ukuphakama emculweni kodwa okufunakalayo yikuthi abantu bazi ukuthi uyahlabela.
“Mina ngaqala ukuhlabela ngo2019 njalo lokhe ngaqalayo ukuhlabela sengakhipha idlalade elilodwa elilengoma ezine ezibalisa ethi Safa Saphela, Isiphiwo Sami, Bayoze bavume, Ngithanda Yena lethi Amazondo yizo ingoma engilazo okwakhathesi. Ngizakhupha idlalade lami elitsha emavikini amabili azayo, ngicela usekelo lwenu. Ingoma lezi izihloko zakhona zizaphuma kuCD lami elitsha elizaphuma, okwakhathesi ngeke ngiziqambe ukuthi yiziphi,” kubika uThabani.
Uqhubekele phambili eveza ukuba abalandeli bakhe bonke labafisa ukuzwa umculo wakhe abamelele ilanga.
“Mhlaka 15 Mpalakazi ingoma zami zizabe sezikhona sengiqeda ukuzipheka ingoma zakhona. Lindani ilanga likhulise umculo wakini lisekele okwakwini, lungiselelani nje masinyane lilinde ukuzwa okumnandi. Lingakhohlwa zulu omuhle ukusibiza phela emicimbini yenu silinandisele ngengoma zethu ukuze siqhubeke sihlabela njalo sikhupha ingoma ezimnandi,” kuphetha uThabani.
