uMthunywa
Ethel Ncube
KULESELA leLalapanzi ebelitshontsha ngozwane elitholakale lilamacala okutshontsha inkomo ezingu-32 loba zitholakele, eligwetshelwe ukuyabhadla iminyaka engu-54 ejele.
Umsolwa uTinodakufa Hove oleminyaka engu-36 yokuzalwa eLalapanzi ugwetshwe iminyaka engu-54 ebhadla ejele ngokutshontsha inkomo.
Kubikwa kusukela ngomnyaka opheleliyo kuze kufike kuwonalo umnyaka, uHove ubetshontsha inkomo ayezithengisela eChivi lapho izakhamizi zakhona ezazingacabangeli ukuthi angabe ezitshontshile.
Ezinye inkomo wayezithatha atshintshise athole inkomo ezinduna ayethengisela abamabhutsha.
Kubikwa ngelanga elingaziwayo watshontsha inkomo eziyisikhombisa zikaBrenda Mushava ebusuku wahamba lazo koChivi wabanjwa ngamapholisa esethole udletshana lokuthi ubonakale eqhuba inkomo zatholakala zonke.
Kuthe lonyaka kuyonale inyanga uHove wabotshwa wahanjiswa emthethwandaba esetheswa amacala okutshontsha inkomo ezingu-32 ezibiza imali engangeUS$12 800.
Isikhulumi samapholisa eNkabazwe uInspector Emmanuel Mahoko uchaze ukuthi inkomo zonke azatshontshwayo zatholakala ezakhamizini zakoChivi ngaphansi kwenduna uWatunga abanikazi bazo abeLalapanzi abayisithupha benelisile ukuqamba inkomo zabo zonke.
“Njengamapholisa sithanda ukubonga uzulu ngokusisekela lokusincweba indlebe ngoba yikho okusincedise ukuthi sibophe isela lenkomo leli,” kuphetha uInsp Mahoko.