uMthunywa
SIYAHLANGANA futhi bafundi ngeviki yokuvulwa kwezikolo, ngithemba livule kuhle ithemu yokucina yomnyaka. Kulabo abazabhala imihloliso yabo yeZimsec yokuphela komnyaka bambani ziqine ukuze liphumelele ezifundweni zenu.
Nanzi impendulo zomsebenzi wakuviki ephelileyo:
a. Nti
b. Khwatshu
c. Tshompo
d. Dlwe
e. Nhlo
f. Lothu
g. Qotshotsho
Kuliviki sizakhangela ukuhlonipha.
EsiNdebeleni inhlonipho yinto eqakatheke okwamagama, kuyazila ukuthi ezinye izinto simane sizithi bhadla nje emphakathini.
Akutsho impendulo zenhlonipho ngolimi olugcwigcwizayo.
Nansi izibonelo:
Lapho umuntu esiyachama sithi thina uyelahla amanzi. Lapha ke:
1. Ukufa kwenkosi yesizwe sithi ………
2. Umuntukazana nxa efile sithi …………
3. Ukumitha komuntu sithi yi……………….
4. Owesifazana ozeleyo sithi …………
5. Umuntu omdala nxa enathe kakhulu kasitsho ukuthi udakiwe sithi ………… njalo lapho ehamba esegcwala indlela yonke sithi ………..
6. Kunzima ukuthi sithi umuntu usuzile kodwa-ke sithi …………
Sizahlangana njalo ngeviki ezayo.
Bafundi thumelani impendulo zenu kunombolo lezi 0773675473 kumbe ku-0778520007 ngeWhatsApp loba ngeSms. Ufake ibizo lesibongo sakho, ukuthi ukuliphi ibanga lokuthi ufunda kusiphi isikolo. Thumela njalo lomfanekiso wakho. Kuphephandaba lakuviki ezayo sizafaka impendulo kanye lezithombe zenu.
