uMthunywa
Fungai Muderere
UMDLALI wenguqu owake wenza izimanga enkundleni uJoel “Josta” Ngodzo kuzwakala ukuba usefuna ukuphenduka adlale futhi, nanko usezama inhlanhla kuqembu le-Adachi.
I-Adachi idlala kuligi yeZifa Division One, kumhlubulo ongezansi yelizwe. Iqembu leli liqeqetshwa nguJohannes Ngodzo, umnewabo kaJosta.
UNgodzo wake wadlalela iHighlanders, FC Platinum leCAPS United. Ngesizini edluleyo wesulwe yiCAPS United.
Umfakazi oqotho oseduzane lomdlali lo uncwebe intatheli yeZimpapers Sports Hub kuliviki ukuba uJosta ulangazelela ukudlalela i-Adachi.
Iqembu leli likusimo esingcono semali nxa liqathaniswa lamanye amaqembu akuligi kaDivision One.
“UJosta kungenzeka athole isivumelwano le-Adachi. Uzimisele kakhulu kulokhu,” kutsho umfakazi lo ongumngane walumdlali.
Nxa engangena kuleliqembu, uJosta uzahlangana labanye abadlali abake badla ubhedu okubikwa basehlelweni lwabaqeqetshi, ababalisa uKelvin Madzongwe.
Ebuzwa ngodaba lukaJosta, umgcinisihlalo we-Adachi uThandazani Zimbwa uthe ongaba lolwazi ngabadlali abatsha ngumqeqetshi wabo.
“Angeke ngibekwazi okunengi kodwa njengoba siphakathi kohlelo lokudinga abadlali, umqeqetshi uJohannes Ngodzo engabalolwazi. Silinde ukuthi asitshele,” kutsho uZimbwa.
Iqembu le-Adachi kukhanya lizimisele ukwenza ngcono lonyaka nanko lomqeqetshi walo wabikela iphephandaba likazulu ukuthi ufuna ukungena leqembu Ieli kuPremier League.
Kumalungiselelo ayo, i-Adachi ikhuphukise uPhilani “Beefy” Ncube ukuthi abengumqondisi wenhlelo zokuqeqetsha.
I-Adachi isekelwa ngemali ngusomabhizimusi ose-Australia, oyinzalo yakuleli u-Adrian Mtungwazi.
Ngesizini edluleyo iqembu belidlalelwa nguNonjabulo Dube, Thandolwenkosi Ncube, Elton Ndlovu, Welcome Ndiweni, Innocent Kutsanzira loCrispen Machisi.
Abanye abatshibilika kuleliqembu bagoqela u-Ocient Ncube, uSpar Dube loBothwell Nyathi loWinston Mhango.
