uMthunywa
Ncekwenhle Ncube
KULESINYE isakhamuzi seMlomoliwoto esithungele indlu yesinye isakhamuzi ngomlilo kubangwa ukuthi bacele umlisa ukuthi amxotshe esigabeni ngoba ecatshangelwa ukuthi nguye oseqede izifuyo zabantu.
Lindabamlonyeni etshiye izakhamizi zihlahle amehlo yenzakale emavikini adluleyo lapho uRobert Banda osolelwa ukuthi nguye olesandla ekunyamalaleni kwembuzi zabantu esigabeni seBafana Bafana ethungele indlu kaNkosikazi Ndlela ngoba engomunye walabo ababethi kaxotshwe esigabeni.
Ekhuluma lentatheli uNkosikazi Silibaziso Dlodlo uthe bezwa ngabantwana sebesithi indlu iyatsha kanti kwakungela mizuzu eminengi uRobert Banda ebonakele edluladlula eduze okwenza bacabangela ukuthi ukuthi nguye oyenze lokhu.
“Akula omunye umuntu ongabalesibindi sokwenza lokhu ngaphandle kwakhe uSaGirl. Lokhe abantu bathi abasamfuni esigabeni segila imikhuba, khathesi wezwakala esithi uMaNdlela uzayidela inkani njengoba setshiselwe indlu.”
Omunye umfakazi oqotho uthe impi leyi yaqala kunyanga edluleyo lapho iqula labantu eladlelwa imbuzi nguRobert lacela umlisa ukuthi amxotshe ngoba engenelisi ukuphila kuhle labanye abantu.
Uthe lokhu kukhanya akumphathanga uBanda owezwakala etshela abantu ngemva komhlangano ukuthi omunye uzamtshayisa ngezulu.
Abasiki bebunda babikele iphephandaba ukuthi ngemva komhlangano esinye isakhamuzi sahlatshwa yisihlabo sagijinyiselwa esibhedlela njalo uBanda wezwakala esithi akulamuntu oqala impi laye ayinqobe. Lokhu kwenza izakhamuzi zakhomba yena ngomunwe ngesehlakalo leso.
Omunye umama othande ukwaziwa ngokuthi nguNaSkha uthe lokhe abantu bathenjiswa ukutshayiswa ngezulu nguBanda bayamesaba. Ubuye waveza ukuthi bonke labo ababekhanya bekhuluma kakhulu sebehlelwe yizinto eziyizimanga njalo ezibuhlungu.
“Abantu balokhe besesaba ukuthi uBanda angabatshayisa ngezulu njengokuthembisa kwakhe. Kathenjwa umuntu lowu njengoba engoweMalawi.
“Ngikhuluma nje kulomunye umakhelwane wami obelaliswe esibhedlela ngemva kokuthi ehlatshwe yisihlabo ngemva kokuxabana loBanda.
“Sicela umlisa lezinye inkokheli zingenele. Sesihlezi nzima ngabantu bokuza esigabeni sethu lapha. Kade sacela ukuthi asuswe kumbe abotshiswe kodwa noma ngaze abotshwe uyaphenduka,” kutsho uNaSkha.
