uMthunywa
Buhlebenkosi Gaule
KULENDODA yakoBulawayo emiswe phambi komthethwandaba weTredgold isetheswa icala lokubhaxabula lokukhumula umkayo amazinyo ngemva kokuxathulwa ngumkayo ngamanzi atshisayo.
Umsolwa uSimon Moyo oleminyaka yokuzalwa engu-34 umiswe emthethwandaba kuviki ephelileyo esetheswa icala lokubhaxabula unkosikazi wakhe amkhumule amazinyo amabili aphambili.
Inkundla izwe ukuba mhlaka 20 kuyonale inyanga umamangala wavuka ekuseni elungisela abantwababo abafundayo ukuba baye esikolo njengalokho ayejwale ukukwenza.
Umtshutshisi uMnumzana Charles Matena ubikele inkundla ukuba umamangala wathi esathelela abantwana amanzi okugeza wezwa esetshaywa ngenqindi emhlane umsolwa esithi kungani umamangala wayemthela ngamanzi atshisayo, lokhu kwakutshengisela ukuba umamangala wayevele efuna ukumxathula.
Umamangala ubikele inkundla ukuthi wayengananzelelanga ukuthi umthelile kodwa umsolwa wahle wamsukela wamtshaya ngenqindi langempama andubana amkhumule amazinyo amabili.
Inkundla izwe njalo ukuthi ababili laba bebengazwanani okungabe kuyikho okubangele ukuthi balwe.
Umantshi kulelicala uNkosazana Adelaide Mbewure uthe icala leli lizathethwa njalo mhlaka 30 Nhlangula kuwonalo umnyaka.