Uncategorized

Uwindi uthembisa ukubulala imbongi

11 Jul, 2019 - 00:07 0 Views
Uwindi uthembisa ukubulala imbongi UMnumzana Lerato Nqindi Ndlovu

uMthunywa

Ethel Ncube
IDLELA egilweni imbongi yeNtalale eGwanda ngemva kokuba ithenjiswe ukuhlahlelwa ngehloka ngomunye uwindi wakule indawo.

Kubikwa uMnumzana Bhekani Jele ulande imbongi uMnumzana Lerato Nqindi Ndlovu ngenyanga edluleyo wamthembisa ukumhlahlela ngoba esehluleka ukubhadala isikwelede sokudlala bonke komunye umcimbi.

Esinye isakhamuzi esikhulume loMthunywa uMnumzana Elias Sibanda uveze ukuba kukhanya kulengxabano phakathi kwalaba ababili.

“UJele walanda uNqindi ethi umfuna phansi phezulu ngobe engafuni ukumbhadala imali yakhe. Sambuza ukuba ukumbulala yiyo yini indlela yokuthi abhadalwe na wehluleka ukuphendula.

“Ngikhuluma nje bacina sebemangalelene emapholiseni ngoba uNqindi engasakhululekanga ukuhamba esesaba ukuba uzezwa ngehloka entanyeni.

Udaba lwabo lusezandleni zamapholisa okwakhathesi akukazwakali ukuba kuhamba njani, balinde ukuya emthethwandaba,” kubika uMnu Sibanda.

Intatheli ixhumane lesinye isakhamuzi sakule indawo esingathandanga ukuvezwa igama laso esiziveze ngokuthi nguMnumzana Moyo esichaze ukuba kulempi enkulu phakathi kukaJele loNqindi.

“Abantu laba asazi ukuthi babangani, iqiniso laziwa yibo bobabili ngoba indaba yabo ayicaci kuhle.

UJele uthi uNdlovu ulesikwelede sakhe kodwa uNqindi uthi kasazi ngoba akula okubahlanganisayo njalo abakaze basebenze bonke. Iqiniso lizavela kuhle emthethwandaba lapho lo othembisa ukugamula omunye ngehloka azatsho khona ukuthi ufuna ukumbulalelani,” kubika uMnu Moyo.

Iphephandaba likazulu liphinde laxhumana lembongi uNqindi oveze ukuba kuliqiniso ukuba bamthembisa ukumbulala.

“Undoda lo nguwindi eGwanda, wangilanda wathi ufuna ukungihlahlela ngehloka esithi ngiyambuluza, angazi ukuthi ngimcaphule ngani.

Mina ukweqa ngidlala inkondlo zami ngiyeqa ngedwa, angikaze ngibize muntu ukuthi azongincedisa.

“Uhamba etshela abantu ethi mina ngilesikwelede sakhe, mina angikweledi lutho lwakhe.

Udaba lolu ngaluhambisa emapholiseni, kumele siye eGwanda ayeveza kuhle ukuthi ulwani lami,” kuveza uNqindi.

Imizamo yokuxhumana lalowo owetheswa umlandu lo uJele yehlule ngoba engalaye umakhalekhukhwini.

Share This:

Sponsored Links