uMthunywa
Intatheli kaMthunywa
KAZILAMATHE izakhamizi zeSunrise Village 2 eHogo eSomabhula ngemva kokuba enye indoda yakulindawo isukele usobhuku yambhaxabula kabuhlungu kungelasizatho okuyisezo esidanise inengi labantu ngoba sitshengisela ukungahloniphi umkhokheli wesigaba.
Izakhamizi zizinde zigane unwabu ngesenzo sika Nhamo Mangena (40) esokusukela usobhuku Anderson Ndlovu (59) wamtshaya kabuhlungu ngamatshe langezibhakela.
Lokhu kwenzakale ngeviki ephelileyo ngenxa yesikhwili esingavezwanga. Kubikwa lalamuhla umetheswacala kakhulumi ukuthi kungani wasukela umkhokheli wesiqinti lo kodwa ukhuluma ekloloda ethi ufuna ukumqedisa njalo kalandaba ngoba angamlimaza ulazo inkomo zokuhlawula phezu kwalokhu athi unukelwa ligazi, kuthi abulale umuntu.
Usobhuku Ndlovu (59) kubikwa wahlangana lometheswacala ezitolo zakoPhophula andubana amsukele ngokumtshaya kabuhlungu.
UMthunywa uxhumane loMnumuzana Nkuthazo Sibiya oveze ukuthi wayekhona uMnu Ndlovu etshaywa.
“Mina ngabona yonke into isenzakala uNhamo wabingelela uNdlovu wavuma uthe esevumile wabe sephambana laye wahle wamjuma emsukela ngemva kwakhe ngezibhakela wasedobha langamatshe wamtshaya ngawo.
“Wambamba intamo wamkhama wamtshaya waze wawela phansi. Uthe esewele phansi wathatha izitina, lamatshe waqala ukumtshaya ngakho emzimbeni wonke kwaze kwaba lechibi legazi phansi.
“Uthe eqeda ukumtshaya ngamatshe wadobha imbokodo ethi usemqedisa vele unukelwa ligazi kwahle kwafika abantu balamulela usobhuku,” nguMnu Sibiya lo.
Umzukulu kasobhuku oziveze ngelokuthi Anotida nje uthe umalumakhe wathwalelwa esibhedlela ngoba wayelimele kakhulu ngemva kokutshaywa ngumetheswacala.
“Umalume wathwalelwa esibhedlela elokhu eqalekile engakhulumi kumbe ukunyikinyeka. Abantu basebecabanga ukuthi mhlawumbe usefile kodwa wafika waphaphama sefike esibhedlela,” kutsho u-Anotida.
UMnu Ndlovu uveze ukuthi yena wahlangana lometheswacala wambingelela kuhle engazo ukuthi uzamsukela amlimaze ngendlela amlimaza ngayo.
“Ngithe ngiqeda kumbingelela sesiphambene ngezwa esengeqela nje nginganakile. Ngezwa sengikhanywa entanyeni lapha ngaphosa ngaphela umphefumulo. Ngathi ngilokhu ngisalwisana lokuthi angikhulule wabe esephezu kwami ngezibhakela ngahle ngawela phansi okunengi angisakukhumbuli.
“Ngikhuluma nje amazinyo ami ayaxega izandla kazibambi lelihlo lesandleni sokudla kaliboni.
“Iqiniso yikuthi angazi ukuthi lumuntu ungicabangeleni kodwa kodwa nxa kuyikuthi ngimphambanisile kungani engangihambisanga emapholiseni kulokungilimaza kanje.
“Ngihle ngatotoba ngayamangala udaba lwami emapholiseni ngemva kokuba sengithole ukwelatshwa esibhedlela njalo lendleko zesibhedlela sezingididanise inqondo,”kulandisa uMnu Ndlovu .
Imizamo yokukhulumisana lamapholisa esabelweni seMidlands yehlule.
