uMthunywa
Wayne Ncube
ZISELE zithithibele izakhamizi zeMintosa eLupane, abaphurofethi sebetshele enye indoda ukuthi izavuka ifile lakanye lokhu kwenzakala.
Izakhamizi kanye lomdeni kamuyi uPhuleni Sibanda zilokhu ziwukhuza umhlolo nanko phela abantu bathi bebuthene emlindelweni kwezwakala omunye umphurofethi etshela lo osengumuyi ukuthi ahambe ayophumula okokucina emzini wakhe ngoba okwakhe emhlabeni sokuphelile, kusasa uzavuka esebalwa phakathi kwasebaya kubokhokho.
Abantu abazange bakukholwe lokhu njalo baqhubeka besenza umsebenzi wabo bengazi ukuthi kusisa bazavuka sebesemalilweni kaSibanda.
Ekhuluma lentatheli yephephandaba likazulu uMnumzana Adornis Dube omunye wezakhamizi zakulesi sigaba uveze ukuthi abaphurofethi laba bafika esigabeni kwenziwa umlindelo okuyilapho abaveza khona ngokufa kukaSibanda.
“Asizange sakukholwa ngesikhathi bekhuluma lokhu, phela vele kuthiwa okwazi ngosuku lokufa komuntu nguMdali kuphela kungakho asizange sikutshaye indiva okwakhulunywa ngabaphurofethi.
“Bamtshela ukuthi izenzo zakhe ezimbi sezimhahabela, sezifike kusibanga esibi kakhulu okokuthi uyavuka eyekwelabokhokho.
Umphorofethi wamtshela ukuthi kahambe eyolala ngoba leli lilanga lakhe lokucina lapha emhlabeni izono zakhe sezizinengi, lakanye uMnu Sibanda wavuka engasekho emhlabeni.
“Akuzange kwaba lensolo ngendlela aphumula ngayo ngoba abomthetho kabazange baphenya okulensolo ngokuswelakala kukaSibanda kukhanya wazifela nje kodwa lokhu kwasethusa thina njalo sibona angani abantu laba loba babebonisiwe kwakungamelanga bakuveze emphakathini lokhu abakuvezayo,” kusitsho uMnu Dube.
Intatheli kaMthunywa iphinde yakhulumisana lomunye wezakhamizi zakuleso sigaba uNkosazana Sanele Sibanda othe lalamuhla abantu basathithibele ngendaba yokufa kukaSibanda.
“Okwenzakala lapha kwasethusa sonke akulamuntu olenkani ngakho. Asazi ukuthi sithini ngakho ngoba sinje sazi uMdali enguye yedwa owazi ngelanga lomuntu lokufa.
“Abantu bathi besizwa isiphurofethi esaphiwa uSibanda abazange bacabange ukuthi yinto engenzakala masinyane futhi.
“Thina sesize sisesaba ukuya lapho okuyabe kulabantu abathandazela abantu ngemva kwalokhu okwenzakala kuSibanda.
“Okubuhlungu kithi yikuthi abantu laba ababizwanga ngumuntu, yilaba abahamba bethandaza ngezigaba kungakho siyakusola sibili ukuthi kungani batshiya indaba ebuhlungu kangaka esiqintini sethu,” kutsho uNkszn Sibanda.
Umthunywa kazange athole inombolo zocingo zabaphurofethi laba okubikwa yibo abatshela umuntu ngelanga lakhe lokucina emhlabeni.
Intatheli yenelise ukukhuluma lomunye othandazela abantu ozibiza ngelokuthi Tshukuza nje kuphela wathi okwenziwe yilaba bantu kuyinsindabaphenduli impela.
“Angali ukuthi umuntu othandazayo angabalakho ukubona ilanga lokufa lomuntu kodwa akumelanga abantu basale belokwesaba kumbe bedidekile ngemva kokuba uthandazile kumbe ubatshele ngekusasa labo,” kutsho uTshukuza.
Omunye njalo othandazayo owaziwa ngelokuthi MaDlamini uthe: “Abantu abathandaza okomoya loba abaphurofethi bangabe belaso isiphiwo sokuboniswa ikusasa kumbe ilanga lokufa komuntu.
“Ngomthetho okhona wonke umuntu oyelaphayo uyathola imfundiso kunhlanganiso yeAfrican Traditional Religion Association ngendlela abikela ngayo abantu indaba ezinje njalo siyafundiswa ukuncedisa umuntu oyabe evezelwe udaba olufana lalolu ukuze singatshiyi ukuxabana kanye lokwesaba lapho eselaphe khona,” kutsho umphurofethi uMaDlamini.
Intatheli ixoxe losobhuku wakule indawo uMnumzana Bonnet Sibanda wathi yena udaba lolu kazange alwaziswe ngabantu.
“Ngahamba emngcwabeni okuyilapho engezwa amahemuhemu okuthi umuyi wanatha kakhulu utshwala okungabe kuyikho okwabangela ukufa kwakhe.
“Okokuthi watshelwa ngokufa kwakhe angikwazi. Abaphurofethi laba bafika kulesisigaba bezokhipha imikhoba ekilinika lapho okwaphuma khona izinyoka lezikhova,” kuphetha uSobhuku uSibanda.
