uMthunywa
Thando Dube lo Musa Janga
IZAKHAMIZI zaku Ward 1 eMagedleni eGwanda zihlezi ziphethe izibindi ngezandla ngemva kokubonakala kwamanzi akwelinye idamu elikule indawo etshintsha esiba bomvu gebhu okwegazi.
Abantu bakulindawo kabayivali imilomo ngalindaba nanko phela kubikwa kulehlekana labantu abathiya inhlanzi ababona lokhu kusenzakala okwenza abantu bacabangele ukuthi kungabe kulenjuzi kulelidamu ngoba lamanzi kubikwa abephakama.
UMthunywa uvakatshele kuleyondawo lapha akhulume khona lezakhamizi eziveze ukwesaba ngokuthi injuzi le singabayingozi empilweni zabo ngoba ikhanya ingezanga ngokuhle.
UMthunywa ukhulume loGabriel Mpala oyisakhumuzi sakule indawo owayekhona mhla wesehlakalo lesi.
“NgoMvulo weviki ephelileyo sithiya inhlanzi sabona ithunzi lento eyayihamba ngaphansi kwamanzi. Lokhu kwathi kusenzakala inhlanzi zaqala ukweqa kutshengisela ukuthi zethukile. Ngesikhathi sakhona amanzi atshintsha ababomvu gebhu okwenza lathi sacela ezinyaweni,” kuchaza uMpofu.
UMthunywa uphinde wakhulumisana lesinye njalo isakhamuzi esiziveze ngokuthi nguSeka Brian nje kuphela esithe sabona ngamanzi ebophana abuye aphakama amthela okwenza wacabangela ukuthi yinjuzi.
“Bengithiya ngeSonto edlulileyo ngabona amanzi ebophana ephakama esiza kimi. Ngahle ngabaleka.
Ngendlela amanzi la ayebophene ngayo njalo engilanda ngacabangela ukuthi yinjuzi njalo ngokubona kwami yayizangibulala ngabe angibalekanga.
“Sesihlalela evalweni njalo akusathiyeki edamu leli ngoba siyesaba ukuthi injuzi le ingasivelela futhi kambe ngubani owake wabona amanzi etshintsha esiba bomvu gebhu ngaphandle kweBhayibhilini kuphela,” kutsho uSaBrian.
UMthunywa uphinde njalo wakhulumisana loSamkelo Ndlovu oveze ukuthi bahlalele evalweni ngoba idamu leli libucwadlana lomuzi wakhe.
“Okwenza ngesabe kakhulu ngalindaba yedamu yikuthi ngakhele eduze ledamu leli.
“Abantu bayakhuluma bathi mhlawumbe kulenjuzi kulelidamu ngakho sengisevalelweni ukuthi into le singangibulala kumbe omunye wemuli yami. Iziga ezinje zijwayelekile kulesisigaba ngoba kuledamu leMasholomoshe eliseduze lathi khona eseliqede abantu abanengi ikakhulu abantwana besifa ngokugalula okungazwisisekiyo.
“Minyaka yonke kufa umntwana egalula okungazwisisekiyo ngakho lathi ngokuzwa ngokuthi lakuleli sokulezinto ezingazwisisekiyo sesihlalelele evalweni ngoba sisesaba ukuthi into le sizasiqedela abantwana,” nguNdlovu lo.
UMthunywa uphinde wakhulumisana loSobhuku uMnumzana Patridge Ndlovu othe kuqakathekile ukuthi uhlupho lolu lulungiswe kungakonakali.
“Njengomphathi wesigaba ngikubona kufanele ukuthi uhlupho lolu lulungiswe izinto zingakonakali.
Silohlupho ngedamu leMasholomoshe eliqeda abantu njalo asilasifiso sokuthi lakuleli damu kubelomonakalo ofana lalo. Sivakatshelwe ngumphrofethi Dumisani Moyo esifisa ukuthi asincedise ngokulungisa lolu uhlupho. Indaba le sizayibikela abanye abaphathi bezigaba kanye lenduna uMasuku ukuthi banike uMphurofethi lo imvumo asilungise idamu leli ngoba singahlala singaphelelwa zimuli zethu,” kutsho uSobhuku uNdlovu.
UMthunywa uphinde njalo wakhulumisana lomphrofethi uDumisani Moyo owebandla le Apostolic Faith Mission Church in Zion othe yena nxa ekhuleka uyayibona injuzi edamu leli njalo ngoba idamu leli lilitsha lingazake likhungwe okutsho ukuthi akukaze kufele muntu sokungalahleka impilo zabantu ngakho yena engakulungisa lokhu engavunyelwa ngabaphathi besigaba abagoqela induna.
“Mina nxa ngikhuleka ngiyabona injuzi edamu leli njalo ngokwenza kwayo ngokutsho kwabantu abasebeyibonile ayizanga ngokuhle sibili. Njengoba idamu leli lilitsha alikaze lifele muntu ngakho injuzi le ifuna impilo zabantu kodwa lokhu sengingakulungisa nginganikwa imvumo ngabaphathi besigaba,” kuchaza uMphurofethi Moyo.
“Isigaba lesi siyakudinga ukuhlanzwa kulandela ukufa kwabantu okungazwisisekiyo njalo lezifuyo zichema igazi ngoba behlutshwa zinyoka,” kuphetha umphrofethi uMoyo.
