uMthunywa
Leonard Ncube
KULENDODA yeBinga emiswe phambi komthethwandaba isetheswa icala lokutshontsha inkomo eyalobola ngazo kwabozala.
UPastor Mumpande (24) ohlala eNsiya 1 Chamalala Village ngaphansi kwenduna uSaba eBinga kubikwa ngenyanga kaMpalakazi nyakenye wabumba icebo lomfowabo, uEmmanuel Mumpande loLusyomo Believe Sibanda ukuthi bayelanda inkomo ayezihambise koyisezala ezimbili elobola umkakhe ongazange waqanjwa emthethwandaba.
UMumpande utshele inkundla ukuthi wabona kufanele ukuthi alande inkomo zakhe ngoba eqede inyanga eziyisithupha engayazi inkonzo yekamelweni.
UMupande wayelobole umntakaNkosazana Stella Muntanga (41), umamangala ohlala eSiabuchoko 6 Lwanzi ngaphansi kwenduna uPashu.
Kubikwa umsolwa ubikele inkundla ukuthi waqeda inyanga eziyisithupha engembathi ingubo lonkosikazi wakhe okuyikho okwabangela ukuthi “ayethatha” inkomo zakhe.
UMumpande, lomfowabo kanye loSibanda bamiswe phambi kukamantshi weHwange, uMnumzana Tomupei Zhou besetheswa icala lokutshontsha inkomo.
Umthethwandaba ufumane abathathu laba belecala bagwetshelwa ukuhlala ejele okweminyaka emithathu kodwa isigwebo lesi siphinde sabekwa eceleni ukuze sibeluse bangenzi icala elifanayo.
Abathathu laba bakhangelelwe ukuthi babhadale inkundla i$100 000 ngamunye, bangehluleka ukubhadala imali le, bazavalelwa ejele okwenyanga eziyisithupha ngamunye.
Umtshutshisi uNkszn Nomusa Maseko utshele inkundla ukuthi abasolwa badelela isiko lakibo ngokuyalanda inkomo koyisezala lokungena esibayeni.
“Kwakufanele belalele induna eyabacebisa ukuthi balandele isiko bathume umuntu ayebika ukuthi bafuna amalobolo abo,” kutsho uNkszn Maseko.
Kubikwa abasolwa bangena emzini kaNkszn Brita Munenge bavulela inkomo ezinhlanu zikaninazala kaMumpande ezazisesibayeni baziqhuba.
Indodakazi kamamangala kubikwa yehluleka ukubavimba.
Inkomo ezintathu zatholakala emadlelweni aseduze kuthi ezimbili ezazivele kuMumpande ezamalobolo, zayatholakala ngemva kokuba umamangala esebikele amapholisa.
Induna uSaba olethwe emthethwandaba ukuzofakaza uthe ngomkhuba wesintu sakibo nxa umalukazana emukile watshiya umendo, amalobolo angabiselwa ngemva kokuba imuli zombili sezihlale phansi zavumelana.
UNkosazana Linda Mthombeni nguye obemele abasolwa bobathathu.