uMthunywa
Nomthandazo Ndlovu
NGENXA yokuthanda utshwala okwedlulisileyo kulejaha leKafusi eGwanda elitshontshe ibhakede lamacimbi lawathengisa ngezigubhu zamasese ezimbili.
Lesisenzo esimangalise uzulu senzakale ngoMvulo kuviki ephelileyo lapho uMoment Moyo atshontshe khona amacimbi kaNkosikazi Siphephile Mpofu wawathengisa ngamasese.
Ekhuluma loMthunywa uNkosazana Poloko Sebata uthe isenzo sikaMoyo asibamangalisi njengoba esaziwa ukuthi vele ulesandla.
“Mina akusangimangalisi ukuthi uMoment utshontshile, vele usesaziwa lapha ukuthi lisela elikhulu, ungani sewadlula ngoba into azenzayo zinzima.
“Isimanga loba angaze atshontshe uthengisela khonapho eduze, yikho okumbambisileyo ngoba mina ngizwe kuthiwa uthembise omunye amacimbi wathi ulawo emzini wakhe amthengele izigubhu ezimbili zabo batai munhu ebhawa benatha,” kutsho uNkszn Sebata.
Esinye isakhamuzi esithande ukwaziwa ngokuthi nguSthe sithe uMoyo wezwakala ebhawa benatha esithi uthengisa amacimbi.
“Thina besinatha sezwa esithi uthengisa ibhakede lamacimbi, asazi ukuthi bavumelanani loChauke ngoba sabona semthengele izigubhu ezimbili zamasese.
“UMoment angazi ukuthi ulomoya bani, ezinye izinto azithengisayo uzithengisa ngemali encane, angazi kumbe yikuthanda utshwala, thina sezwa ngelanga elilandelayo ukuthi uMaMpofu utshontshelwe amacimbi sahle sazi ukuthi yiwo abethengiselwa abantu ebhawa,” kuchaza uSthe.
UNkkz Mpofu onguye owatshontshelwa amacimbi uthe usamangele ukuthi umuntu angamtshontshela amacimbi akhe awasebenzele nzima awathengise ngamasese.
“Mina angilankani ngilapha, ngitshontshelwe amacimbi emzini wami endlini esihlalisa amabele lokunye nje, indlu yakhona ihlala amasaka, ngimangele mina ngivuka ekuseni ngithola ifasitela livuliwe ngathi ngingena ngathola elinye isaka lami lamacimbi lingasekho.
“Bengicabangela nje ukuthi kungaba nguye uMoment ngoba ulesandla kodwa ngeke ngigcone umuntu, kodwa ngithe sengisizwa ukuthi uzwakale ethengisa amacimbi ngahle ngazi mhlophe ukuthi nguye, ngizwa ubuhlungu ngoba ubufakazi bokuthi nguye angilabo, angisoze ngivule icala emapholiseni. INkosi izambona,” kutsho uNkkz Mpofu.
Ebuzwa ngodaba lolu uMnu Chauke owathengiselwa amacimbi uthe yena wathenga engakwazi ukuthi uthenga emuntwini ogangayo.
“Mina vele angihlali lapha, siqhatshiwe ukuzogebha umgodi wamanzi ngakho mina ngithe ngisizwa umuntu esithi uthengisa amacimbi njalo abebambeka ibhakede ulithengisa nge$10 ngahle ngathi ngiyawafuna ngoba abetshiphile.
“Okokuthi ngiwathenge ngamasese asiqiniso, ngithe eyinye ngizamnika ngingathola ngoba okwesikhathi leso bengilemali eyenela lobo tshwala kuphela engimthengele bona,” kutsho uMnu Chauke.
UMoment yena uphike wemba phansi ukuthi utshontshe amacimbi kaMaMpofu wathi ngawakhe azigolela wona.
“Abantu balapha bayangizonda sibili, amacimbi la ngazigolela mina njalo angiwathengisanga ngamasese kuphela, mina ngiyazi ukuthi sakhulumani loChauke,” kuphetha uMoment.
