uMthunywa
MANAGUA — Owesifazane oleminyaka engu-25 ubudala utshonile ngoLwesibili ngemva kokuphoswa emlilweni kukhitshwa amadimoni, kutsho iziphathimandla zaseNicaraguan, ezicaphune abazibonele bethi ukhunyulwe wasala enqunu wabe esetshiswa.
Izikhulu zithi owesifazane, uVilma Trujillo Garcia, utshe kakhulu umzimba wonke.
Abatshutshisi bathe umfundisi uJuan Gregorio Rocha Romero kanye labanye abantu abane babotshiwe kulandela lesi sehlakalo.
URocha Romero uyakuphika ukuthi ulecala, kanti utshele iphephendaba iLa Prensa ukuthi owesifazane uwele emlilweni engabanjwanga ngamandla, amadimoni ase eyaphuma emzimbeni wakhe.
Umyeni wesisulu, uReynaldo Peralta Rodriguez, uthe umkakhe ungeniswe endlini yesonto ngeledlule ngesikhathi kukholakala ukuthi ulamadimoni kulandela ukuhlasela abantu ngocelemba.
“Ayixoleleki into abasenze yona. Babulale umkami, umama wezingane zami ezimbili ezisencane,” etsho.
“Manje ngizobatshela ukuthini nje abantwana bami?” — AP
