uMthunywa
Msilisi Dube
KULENDODA edabuka eLusulu, eBinga ebhaxabule umalumayo qede yamlumathisela endlini kubangwa inkomo zelifa.
Indoda le engumetheswacala, uJaphet Muleya, okucatshangelwa ukuba ingaba leminyaka yokuzalwa engu-26 kubikwa yenze ihlazo leli ngeSonto kuyonale iviki.
Umfakazi wesiga lesi uTrust uvezele uMthunywa ukuba umetheswacala wayehlala exabana lomalumakhe uNkosazana uGetrude Ndlovu bebanga inkomo.
“Abazali bakaMuleya babhubha ngomnyaka ka-2011 ngakho umalumakhe nguye owasala emgcinile. Ababili laba babehlala bexabana njalo sebake bayakhuzwa ngusobhuku.
“Kuyonale iviki uMuleya kukhanya wabuya edakiwe ebusuku wabuza umalumakhe ukuba kungani engafuni ukumnika inkomo zakhe.
“Umalumakhe wamchazela ukuba kumele bazabelane kodwa lokhu kukhanya akuzange kumphathe kuhle ngoba wahle wavuka umhlonga waxabana laye,”” kulandisa uTrust.
UTrust uqhubekele phambili wathi umetheswacala watshaya wahlasela umalumakhe, ngemva kwalokhu wamvalela endlini qede wayilumathisa ngomlilo.
“Umetheswacala watshisela umalumakhe endlini, ngenhlanhla enkulu wenelisa ukuvula umnyango ngakho kazange alimale,” kuchaza uTrust.
UNkosazana Ndlovu uthe kuliqiniso ukuba waxabana lomzukulu wakhe kodwa sebelulungisisa udaba lolu njengemuli.
“UMuleya wabhujelwa ngabazali bakhe kudala ngakho babengilaye ukuba ngithengise inkomo ngimbhadalele esikolo.
“Ezinye inkomo bathi kumele sizabelane njengoba kuyimi engimgcinileyo. Kwathi sekumele seizabelane e kazange akuthakazelele ngakho waqalisa ukungithethisa. Emalangeni adluleyo sike saxabana ngalezo nkomo waze wafika kusibanga sokulumathisa indlu yami umlilo ngiphakathi,” kuchaza uNkszn Ndlovu.
UNkszn Ndlovu uthe kazange alimale njalo wahle wamnika lezo mpahla esenzela ukuba behlalisane kuhle.
“Inkomo lezo zingu-12 lami bekumele ngithathe eyami ingxenye laye athathe eyakhe kodwa ubengafuni yikho ngibone kungcono ukuba ngimnike ngitshiyane lokukhuluma.
“Udaba lolu angizange ngilubike emapholiseni ngoba lo ngumzukulu wami njalo ngiyazi mhlophe ukuthi uzazisola kwelinye ilanga,” kuchaza uNkszn Ndlovu.
