uMthunywa
Thokozile Mbedzi
ZILOKHE zitshe amathe izakhamizi zesigabeni seTshamaswiswi eBeitbridge East ngemva kokuba enye indoda itshise umuzi womngane wayo isola ukuthi kayinikwanga ingxenye yayo yenzuzo yokuthengisa imota abayitshontshayo.
U-Adonia Mudau kubikwa ungene indlela waqonda emzini womngane wakhe uMatshidzi Sibanda oleminyaka engu-26, wafica unkosikazi wakhe uGrace Munyayi oleminyaka engu-19, wafika wabuza ingxenye yakhe yemali yemota abayitshontshayo, andubana atshise umuzi wonke kuviki ephelileyo.
Ekhuluma lentatheli kaMthunywa, uMnumzana Ben Ndou uthe uMudau uthethe isinqumo sokutshisa umuzi womngane wakhe ngoba enganikwanga imali yemota abayitshontsha bonke.
“UMudau kunye loSibanda kukhanya babe lokungazwisisani ngemva kokuba uMudau encitshwe imali. Ababili laba kukhanya batshontsha imota eGoli bayiletha kuleli ngokungekho emthethweni, andubana benze isivumelwano sokuba imota le bazayithengisa babe sebesabelana inzuzo abazayithola.
“USibanda yena kuthiwa wathi esethengise imota wahle wanyamalala lemali, wancitsha uMudau ingxenye yakhe. UMudau akuzange kumphathe lokhu, wasuka kweleSouth Africa waphenduka ekhaya, waya emzini kaSibanda wafica kulonkosikazi wakhe, wamtshela ukuba kafonele umkakhe ngoba efuna imali yakhe ngokuphangisa.
“UmkaSibanda wakwenza lokhu kodwa inkinga, ucingo lwala ukungena. Ekuphendukeni kwakhe uSibanda wabuza impendulo kodwa wangatholi ayekukhangelele, wasenquma ukuthi kungcono atshise umuzi ngoba umkakhe engafuni lemali yakhe,” kulandisa uMnu Ndou.
Uqhubekele phambili waveza ukuthi uSibanda watshisa izindlu ezintathu kunye lempahla zonke ezaziphakathi.
Isikhulumi samapholisa esabelweni seMatabeleland South, uAssistant lnspector Stanford Mguni ebuzwa ngodaba lolu uvumile wathi solufikile ehofisini yabo.
“Udaba lwendoda etshise umuzi wenye eyayitshontshe layo imota kweleSouth Afrika bayingenisa kweleZimbabwe okungekho emthethweni, solufikile ehofisini yethu.
“Amadoda lawa adala icala leli ngenyanga kaNhlolanja kungakho amapholisa asaphenyisisa ngodaba lolu,” kuphetha uAsst lnsp Mguni.
