uMthunywa
Ethel Ncube
KULENDODA yesiqintini seNtalale eGwanda etshaywe yinkosazana ngeviki ephelileyo kubangwa amasimu.
UMnumzana Eliah Ndlovu wehlelwe ngamashwa la ngempelasonto ngesikhathi esemzini wakhe.
UMthunywa uzwe ukuthi uMnu Ndlovu wake waxabana lomakhelwane wakhe ekuqaleni kwawonalo umnyaka kubangwa amasimu lapho athi uzazibonela okuyikho okubangele ukuthi ehlelwe liyezi leli elimnyama uMnu Ndlovu athi kubangelwe nguye.
Esinye isakhamuzi esikhulume loMthunywa uMnumzana Gerald Mathe uveze ukuba ngesikhathi sezulu abantu bavele bayazamana.
“Ngalelolanga akuzange kune izulu eliyangaphi, kwakungumfefezo nje kodwa isimanga yikuthi sezwa sekuthiwa uNdlovu usetshaywe yinkosazana emzini wakhe.
“Kukhanya wathi ephuma emkulwini esiya endlini enkulu inkosazana yahle yamtshaya unyawo lwahle lwaphenduka umbala.
“Umbuzo ebesizibuza wona yikuthi kungani umbala wakhe wahle wasala umnyama tshu okwelahle yikho nje sicabangela ukuthi kulenkulumo phakathi njalo kayisuye wakuqala ukutshaywa lizulu kusale kungani akucaci, kutsho ukuthi abantu bagangelana ngenkosazana,” kubika uMnu Mathe.
Intatheli ixhumane lesinye isakhamuzi sakule indawo uNkosazana Samkele Ndlovu obike ukuba babona isimanga.
“Okwasimangalisayo yikuthi izulu lalingadumi lingathini kodwa inkosazana yaphazima kanye sezwa sekuthiwa uNdlovu sehlelwe ngamashwa.
“Lesi yisintu, akula okunye njalo abantu bayangunguna ukuba lo owatshaywa ngumbane wake waxabana lomunye ekuqaleni komnyaka bebanga amasimu wamthembisa ukuba uzamthumela izulu, asazi kumbe nguye kumbe zinkulumo zabantu kuphela,” kubika uNkszn Ndlovu.
Iphephandaba likazulu lixhumane loMnu Ndlovu owehlelwa ngamashwa la oveze ukuba ulesimanga ngokwamehlelayo.
“Izulu lalifefeza lingani okuyangaphi ngathi ngiphuma emkulwini ngisiya endlini kwaphazima, ukuthi ngatshaywa njani lami kangikwazi kodwa ngezwa unyawo solutshisa sengiwele phansi sokuvuleke umzila enhlabathini angani ngumgelo.
“Unyawo lona lwahle lwaba mnyama tshu angani ayisilo lwami ngingasakwanisi lokuvuka, ngancedwa ngomakhelwane abangivusa bangithwalela komunye usiyazi onguye ongelaphayo khathesi kodwa ngeke ngitsho umnikazi ukuthi ngubani kodwa ukhona olesandla kukho,” kuphetha uMnu Ndlovu.
