uMthunywa
Ethel Ncube
KULENDODA yeZezani eBeitbridge elokhe ithoba amanxeba ekhanda isitshaywe ngumkayo ngoqwa ngoba ethole umlayezo kumakhalekhukhwini ovela kudlalicatsha alithola kuhlelo lukaPhemba Umuzi.
Udaba lolu lwenzakale kumaviki amabili adluleyo lapho uNkosikazi Maritha Ndou atshaye umkakhe, uMnumzana Tumelo Ndou ekhanda ebala umlayezo ovela kudlalicatsha alithola kuhlelo lukaPhemba umuzi.
Elinye ilunga lemuli le elikhulume loMthunywa uNkosazana Makabongwe Ndlovu uchaze ukuthi udaba lolu lwabamangalisa.
“Ukuthi uNdou usolani kumkakhe yena etshadile kangikwazi sibili. Mina babuya kimi bedonsana uMaritha ethwele izicathulo ekhwince lezigqoko okokuthi bekuliwa. UMaritha wachaza ukuthi umkakhe usekhonjwe ngumuntu amthole ephepheni angamaziyo lokubamazi.
“Wachaza ukuthi umkakhe lomuntu wakhe lo kabakabonani, bebesakhulumisana kumakhalekhukhwini kodwa uthando kukhanya soluvutha. Owangakithi yena wayethule zwi ekhala ngokuthi umfazi uyamdelela ngokumtshaya,” kubika uNkszn Ndlovu.
Uqhubekele phambili echaza ukuthi uMnu Ndou ubengumuntu ongehlukani lamaphephandaba kanti kuyabe kukhona akudingayo.
“Bengihlala ngimangala ukuthi umzawami maviki onke uhlala edinga amaphepha kanti udinga abanye abafazi. Angazi ukuthi uyisiphukuphuku esinjani esikhombisa umfazi esingamaziyo ngitsho aze adliwe imali.
Umalukazana wangibikela ukuthi ubesethi lanxa egeza ahambe locingo lwakhe, nxa kulalwa ebusuku uyalucitsha ethi uzama ukugcina umlilo kanti uvala indaba zakhe.
Amadoda awasuthi sibili, asazi ukuthi afuna abanjani. Sahlala phansi njengemuli sabhula umlilo wakhuzwa, ngilethemba uzaguquka ezenzweni zakhe zabafazi.
Ekhuluma lentatheli uNkkz Ndou uchaze ukuba liqiniso ukuba wathola umlayezo wedlalicatsha ecingweni lomkakhe.
“Okokutshaya umuntu angilampendulo yakhona sihlobo. Engingakutsho yikuthi amadoda avele ayehlula umuntu, akutshiye ayekhombisa ephepheni, lokhu akulangqondo. Okungcono yikukhiya umuntu, lokho kungeke kungiphe uhlupho,” kuchaza uNkkz Ndou.
Iphephandaba likazulu lixhumane loMnu Ndou owale ukuveza sobala ngendaba le.
“Oqale ngodaba lwakhona kakulandisele konke, mina angilakho engingakutsho kumaphephandaba,” kuphetha uMnu Ndou.
