uMthunywa
Thokozile Mbedzi
ZILOKHE zibabaza izakhamizi zelokitshini lePhakama, eGwanda ngemva kokuba enye indoda itshaywe ngamagetsi omtshina wokugiga igolide yafa endlini yayo.
Isehlakalo lesi senzakale ngoMvulo kuyonale iviki.
Kubikwa uDennis Makombe oleminyaka engu-23 utholakale etshe umzimba wonke etshiswe ngamagetsi egaya igolide.
Ekhuluma lentatheli kaMthunywa uNkosazana Nancy Khumalo uthe lokhe bengelankani ngabakubonileyo.
“Isehlakalo lesi sitshiye izakhamizi zethukile. UMakombe uvuke esenza umsebenzi wakhe wokugiga igolide.
“Kukhanya walayitha umtshina wakhe ukuze agige igolide kodwa ngokusweleka kwenhlanhla wasetshaywa ngamagetsi amtshisa umzimba wonke wahle wafela khonapho ngemva kwendlu yakhe.
“Omakhelwane sididekile, kukhanya intambo zamagetsi kazifakwanga ngendlela eqondileyo yikho kuze kwaba lomonakalo,” kulandisa Mnu Khumalo.
Isikhulumi samapholisa esabelweni seMatabeleland South uInspector Loveness Mangena uthe kulendoda efe ngemva kokutshaywa ngamagetsi emzini wayo.
“Udaba lwendoda etshiswe ngamagetsi igiga amatshe ngemva kwendlu yayo solufikile ehofisini yethu.
“Amapholisa akhuthaza uzulu ukuba ngaso sonke isikhathi nxa besebenza kabaqakathekise ukuvikeleka emsebenzini yabo. Kababone ukuthi lempahla abazigqokayo ziqondile futhi zihambelana lomsebenzi abawenzayo.
“Sikhuthaza uzulu ukuthi nxa esebenzisa imitshina kabadinge ulwazi lokuba imitshina leyo ifuna amagetsi anganani lokuthi isebenza kuhle ngoba ukungalandeli imithetho le kuyingozi.
“Amapholisa asaphenyisisa ngodaba lolu ebambene labeZETDC kungakho labo bazaphenyisisa ngolwazi lomsebenzi wabo babe sebesinika impumela ngomonakalo lowu wamagetsi,” kuphetha uInsp Mangena.
