uMthunywa
Ethel Ncube
KULEDLALICATSHA leChipale, eBinga eliboniswe inkanyezi emini kaBha nanko phela libhaxabulwe laze lazitshiya ngelinye kubangwa ukuthi beselithandana lomkalo.
Idlalicatsha leli, uMelisa Muleya uyifunde ivaliwe ngempelaviki edluleyo ukuthi indoda yomnikazi iyabulalisa njengoba uNkosazana Shylet Mudimba embhaxabule kwaba ncane indawo ngoba umkakhe ebonakale ehambisa amanzi koMuleya ngenqola.
Ekhuluma loMthunywa omunye wezakhamizi zakule indawo uNkosazana Nokuthula Dube uveze ukuba ababili laba baqala bebiselana ngezibhakela kwaba luthuli.
“Amanina lawa ahlangana esiya enkunini omunye esevela khona baqala ukubuzana ngendoda kaNkszn Mudimba kwahle kwaba ngumsindo khonokho batshitshela ezandleni.
“Mina ngafika ngisedlula kukhala inqindi njengenqindi abantu sebemhlophe nke bebhuqana ngezibhakela. UMuleya yena babevele sebemtshaye kwaze kwathululeka wonke amabhawudo wazitshiya khonapho,” kutsho uNkszn Dube. Uqhubekele phambili echaza ukuthi ababili laba babebanga indoda eyabonakala ihambisa amanzi ngenqola koMuleya.
“Kukhanya indoda kaMudimbe yabonakala ingena koMuleya ngenqola ithwele amanzi yaze yaphekelwa letiye yikho nje wayesetshaywa,” kutsho uNkszn Dube.
Intatheli ixhumane loNkszn Muleya oveze ukuba walwa loMudimbe.
“Kuliqiniso ukuthi salwa kwaba kubi loMudimbe sibanga ukuthi kungani umkakhe ebuye emzini wami ngamnika itiye engazi ukuba ngangimbhadele imali ukuba enze lokho.
“Ngangingeke lami ngithule umuntu engisunduza njalo engethesa icala engingalaziyo. Okokuzitshiya kwami ngikuzwa ngawe,” kubika uNkszn Muleya.
Iphephandaba likazulu lixhumane loNkszn Mudimbe onguye owatshaya omunye ovumileyo ukuthi udaba olunjalo lwenzakala.
“Umkami wahamba koMuleya yathi isifike kimi ebusuku sokulalwa yala ukwembatha lami yikho ngatshaya uMuleya ngoba wayecine ukuya ngakwakhe,” kuphetha uNkszn Mudimbe.
