uMthunywa
Nomthandazo Ndlovu
ZISELE zinkemile izakhamizi zeNyamandlovu nanko phela kulenina elibhuqe umkalo walabhela kubangwa imali yemibhida ebithengisiwe.
Lesi siga senzakale ngoMgqibelo weviki ephelileyo lapho uNomatter Mhlanga atshaye khona umkakhe uMnumzana Melusi Nkomo kubangwa ukuthi kungani ebuye lemali engenelanga yemibhida.
Ekhuluma loMthunywa uNkosazana Sibusiso Bhebhe oyisakhamuzi sakule indawo uthe abakubona mhlalokho kwatshiya abantu bemangele njalo lembambo zibuhlungu.
“Besihlala sisizwa ukuthi uMaMhlanga uyamtshaya umkakhe kodwa besingakaze sikubone kodwa hatshi ukutshaywa, umtshaye sikhangele ngawethu la bebanga ukuthi uNkomo uthengise imibhida waya ekhaya lemali engenelanga enye eseyinathile.
“UNkomo wathutsha ekhaya edakiwe sedle imali yemibhida ngoba abantu laba bavele beziphilela ngokulima, yikho okwenza uMaMhlanga wazonda,” kuchaza uNkszn Bhebhe.
Ebuzwa ngodaba lolu uMnu Nkomo uvumile ukuthi balwa lomkakhe njalo uyavuma ukuthi wamphambanisa.
“Yebo silwile kodwa angithi abantu bonke bayalwa nje akumangalisi, ngamphambanisa umkami ngasebenzisa imali okwakungamelanga ngiyidle kodwa ukuthi wangitshaya asiqiniso, salwa,” kuchaza uMnu Nkomo.
UNkosazana Mhlanga yena walile ukukhuluma lentatheli wathi abantu bangabongena indaba abangazaziyo.
“Abantu bangabongena indaba zabanye, wena utshelwe ngubani yena lo olamanga okuhamba ekhuluma izinto ezenzakala emizini yabanye abantu?,” kuphetha uNkszn Mhlanga ecitsha ucingo lwakhe.
