uMthunywa
Thokozile Mbedzi
ZILOKHU zinkemile izakhamizi zakuVillage 10 eChiswirizvi eChiredzi ngemva kokuba ijaha elileminyaka engu-18 libhaxabule uyise ngogodo lambulala lisola ukukhuzwa.
Kubikwa uNaison Helelethani oleminyaka engu-60 ubhubhe kuviki ephelileyo ngemva kokutshaywa yindodana yakhe, uEnergy Helelethani oleminyaka engu-18 ngogodo.
UMthunywa uzwe ukuba umetheswacala waba lengxabano loyisekazi okwabangela ukuba uyise aye kodadewabo esiyaxazulula leyonkinga kodwa indodana yakhe yazonda yathatha ugodo lwephane yabhaxabula ngalo uyise.
Kuzwakale ukuba uEnergy waba lokungazwisisani loyisekazi okwenza uyise waya emzini kadadewabo bucwadlana nje lomuzi wakhe.
Kubikwa uNaison wathi efika kodadewabo ngenhloso yokuthi akhulumisane labo, njengoba kwasokulomsindo omkhulu labantu sebebukele, uEnergy wephulela izigodo endlebeni, wadobha ugodo waqala ukutshaya uyise ekhanda, esifubeni kunye lemlenzeni.
Isikhulumi samapholisa eMasvingo uKudakwashe Dhewa uthe umzukulu kaNaison ebona uyisemkhulu eselele phansi njalo esopha wagijima wayabikela ugogo wakhe.
Kubikwa uNaison wathwalelwa esibhedlela seChiswirizvi lapho afika wedlula khona.
“Sibophe uEnergy Helelethani (18) simsola ngecala lokutshaya uyise okubangele ukuthi acine esifa.
“Sixwayisa uzulu ukuthi atshiyane lomkhuba wokusebenzisa udlame nxa kulokungazwanani ngoba lokhu kucina kubangela izehlakalo ezifana lalezi,” kuphetha uInsp Dhewa.
